Ерусалим, 25 евруари 2026 (МИА) - Американските борбени авиони „Ф-22“, кои полетаа од Обединетото Кралство вчера, се распоредени во израелска воздухопловна база во јужен Израел како дел од масовното зголемување на американските воени сили на Блискиот Исток, објави синоќа „Тајмс оф Израел“.

Вкупно 12 „Ф-22“ беа видени како полетуваат од воздухопловната база Лакенхит во Англија, иако еден наводно се вратил во воздухопловната база поради технички проблем.

Борбените авиони „Стелт“ пристигнаа во Лакенхит минатата недела и останаа таму неколку дена, наводно поради проблеми со нивните системи за полнење гориво.

Десетици борбени авиони, вклучувајќи „Ф-35“, „Ф-22“, „Ф-15“ и „Ф-16“, се забележани како се упатуваат кон Блискиот Исток, според Алијансата за воен воздушен мониторинг, тим од 30-ина аналитичари, кој ја анализира воената и владината летачка активност во последните денови.

Тимот вели дека исто така следел десетици придружни цистерни за гориво, како и стотици товарни летови, кои се упатуваат кон регионот од средината на овој месец.

„Тајмс оф Израел“ забележува дека преместувањето на авионите на Блискиот Исток доаѓа во време кога американскиот претседател Доналд Трамп размислува за воена акција против Иран. мс/јт/

фото: Архива