Bruksel, 5 dhjetor 2025 (MIA) - Zëvendëskryeministri dhe ministër i Transportit Aleksandar Nikolloski sot në Bruksel do të marrë pjesë në Këshillin Ministror të Komunitetit të Transportit, ku do të bisedohet për progresin e vendeve të Ballkanit Perëndimor në pjesën e politikës së transportit dhe realizimit të projekteve infrastrukturore.

 Në Këshillin Ministror, me ​​të cilin do ta kryesojë komisari evropian për Transport të Qëndrueshëm dhe Turizëm Apostolis Xixikostas, do të marrin pjesë edhe ministra të transportit dhe përfaqësues të qeverive nga disa vende evropiane, përfshirë edhe Shqipërinë, Bullgarinë, Greqinë, Irlandën, Qipron, Kosovën, Rumaninë, Slloveninë, Serbinë dhe Malin e Zi.

 Sipas paralajmërimeve, Nikolloski në Këshillin e Ministrave  do të flasë  për politikat e transportit të Maqedonisë, progresit dhe zbatimit të projekteve për korridoret evropiane të transportit 8 dhe 10, si dhe për masat dhe aktivitetet për lehtësimin e tregtisë dhe transportit në vendet e Ballkanit Perëndimor.

Përpara takimit, Nikolloski paralajmëroi takime me ministrat nga Greqia dhe Bullgaria, në të cilat do të bisedohet  për bashkimin e dy korridoreve, si dhe për mundësitë e financimit të përbashkët të projekteve të reja në kuadër të Planit të Rritjes. 

 "Vizioni ynë është që Maqedonia të bëhet një qendër transporti në Ballkan. Edhe pse nuk kemi dalje në det, kemi një vendndodhje unike ku korridoret 8 dhe 10, lindje-perëndim dhe veri-jug, kryqëzohen në lindje të Shkupit, dhe ky është përfitimi kryesor që duhet t'u ofrojmë gjeneratave që vijnë pas nesh", tha Nikolloski.

 Këshilli Ministror është organi përgjegjës për arritjen e objektivave të përcaktuara në Marrëveshjen e Komunitetit të Transportit. Ai ofron udhëzime të përgjithshme politike, shqyrton progresin në zbatimin e Marrëveshjes, jep mendime mbi emërimin e drejtorit të Sekretariatit të Përhershëm dhe vendos për selinë e Sekretariatit të Përhershëm me konsensus. Këshilli Ministror përbëhet nga një përfaqësues nga secili vend palë në Marrëveshje, ndërsa të gjitha shtetet anëtare të BE-së mund të marrin pjesë si vëzhgues. Këshilli Ministror mblidhet një herë në vit.

 Nikolloski dje mori pjesë në "Samitin BE-Ballkani Perëndimor" në Bruksel, që e organizon think-tenku "Miqtë e Evropës", ku mbajti një fjalim në panelin "Çështjet e Zgjerimit: Kufiri i Ri Gjeopolitik, i Sigurisë dhe Ekonomik i Evropës".

 Foto: Arkivi i MIA-s