Lagos, 25 dhjetor 2025 (MIA) – Pesë persona humbën jetën, ndërsa 35 u plagosën dje në shpërthimin e bombës në një xhami në qytetin Maiduguri të Nigerisë, qendër administrative e shtetit Borno.

Policia nigeriane tha se ka të ngjarë të ketë qenë një sulm vetëvrasës.

"Hetimet paraprake tregojnë se është e mundur të bëhet fjalë për sulm vetëvrasës bazuar në gjetjen e pjesëve të asaj që duket të jetë një jelek vetëvrasës dhe deklaratave të regjistruara nga dëshmitarët, ndërsa hetimet po vazhdojnë për të përcaktuar shkaqet dhe rrethanat e sakta", tha një zëdhënës i policisë së shtetit Borno.

Askush nuk e ka marrë ende përgjegjësinë për sulmin, por sulmet vetëvrasëse i atribuohen kryesisht Boko Haramit, një grup militant islamik që më parë mori përgjegjësinë për sulme të shumta të tilla në verilindje të Nigerisë.

foto: arkivi i MIA-s