Uashington, 29 mars 2025 (MIA) - Presidenti i SHBA-së, Donald Tramp, mbrëmë paralajmëroi Iranin se "gjërat do të shkojnë keq" nëse nuk arrihet një marrëveshje bërthamore. Paralajmërimi i tij erdhi një ditë pasi Teherani njoftoi se i ishte përgjigjur letrës së tij, duke bërë thirrje për negociata.

"Supozoj … të arrij një marrëveshje me Iranin. Por nëse nuk mund të bëjmë një marrëveshje, gjërat do të shkojnë keq për Iranin", tha Tramp.

Shefi i diplomacisë së Iranit, Abas Aragçi tha se Teherani i është përgjigjur letrës së Trampit, pa e bërë të ditur përmbajtjen e saj.

"Letra e Trampit përmbante kërcënime dhe thirrje për diplomaci. Qëndrimi i Teheranit mbetet se nuk do të zhvillojë negociata të drejtpërdrejta me SHBA-në nën presionin maksimal dhe kërcënimet për ndërhyrje ushtarake. Por negociatat indirekte, siç janë zhvilluar në të kaluarën, mund të zhvillohen", tha Aragçi.

Irani dhe SHBA nuk kanë marrëdhënie diplomatike që nga viti 1980-të, ndërsa interesat amerikane në Iran përfaqësohen nga Ambasada e Suedisë.

Më herët, kryetari i Parlamentit iranian, Mohamad Bager Kalibaf, paralajmëroi se nëse SHBA kryen kërcënime ushtarake kundër Iranit, aleatët e SHBA-së në rajon dhe bazat ushtarake do të bëhen të pasigurta.

Sipas Agjencisë Ndërkombëtare për Energji Bërthamore (ANEB), programi bërthamor i Iranit është avancuar gjatë katër viteve të fundit dhe është më afër se kurrë prodhimit të armëve bërthamore, me rezerva aktuale prej 60 për qind uranium të pasuruar, të mjaftueshëm për gjashtë bomba bërthamore nëse pasurohet në 90 për qind.

Në vitin 2015, Irani arriti një marrëveshje me Francën, Gjermaninë, Britaninë e Madhe, Kinën, Rusinë dhe SHBA-në për të rregulluar programin e tij bërthamor në këmbim të lehtësimit të sanksioneve ndërkombëtare kundër Teheranit. Por në vitin 2018, gjatë mandatit të tij të parë presidencial, Trampi tërhoqi në mënyrë të njëanshme SHBA-në nga Marrëveshja dhe rivendosi sanksionet ndaj Iranit. Si përgjigje, Teherani rriti rezervat e tij të uraniumit të pasuruar në 60 për qind.

Irani pretendon se energjia bërthamore është për qëllime civile dhe mohon se dëshiron të marrë një bombë atomike, për të cilën dyshojnë vendet perëndimore. sa/

foto: EPA