Штип, 22 октомври 2024 (МИА) – Културата е движечка сила за духот на еден народ, а ние во држвата имаме огромно фолклорно богатство, што значи Македонецот може да се пофали и во светски рамки, истакна Иван Котев познатиот маекедонски фолклорист пред студентите на Универзитетот „Гоце Делчев“ (УГД)-Штип. „Фолклорот наша идентитеска приказна“ беше насловот на денешното предавање, на кое присуствуваше и универзитетскиот професор, Горанчо Ангелов, професор на музичката академија при УГД.

- Без култура, без народ, без територија нема држава. Значи културата е движечка сила на духот на еден народ. Ние тука во нашиот регион имаме огромно фолклорно богатство, не само песни, приказни, легенди, преданија, поговорки пословици, туку имаме и материјална култура, многу јака, а тоа се домашни ткаенини, изработки, музички инструменти и целото тоа нешто што го изработува еден народ свој и самобитен, изворен. Значи нашиот народ од овој крај, може да се пофали во светски размери, изјави Котев.

Професорката на катедрата за македонски јазик и книжевност на Филолошкиот факултет при УГД-Штип, Ана Витанова Рингачева, истакна дека студентите од овој факултет имаат предмет митифолклор, што значи дека тие имаат базични познавања за тоа што значи македонскиот фолклор.

-Студентите на македонистика на катедрата македонски јазик и книжевност го учат предметот митифолклор што значи тие имаат базични познавања за тоа што значи македонскиот фолклор, рече Витанова Рингачева.

Фолклорот е од големо значење за една држава, согласен е и професорот на музичката академија Горанчо Ангелов, кој вели дека фолклорот постои, ќе постои се додека се создава.

-Па веќе како што рекоа моите колеги, фолклорот е лепеза на народното творештво и подразбира дека сите овие елементи на свој начин имаат свој придонес за таа идентитетска идентификација. Фолклорот постои, ќе постои се додека се создава но и поддржува и како трето додека се пренесува тоа фолкорно творештво, изјави Ангелов. вдј/цр

Фото: МИА