Скопје, 18 октомври 2024 (МИА) - Во организација на Фондацијата КАНТАРОТ денеска и утре во Меѓународното училиште НОВА ќе се одржи третата конференција „Наука за деца“. Целта на конференцијата е популаризација на науката кај децата и подигање на интересот за истражување на научните концепти.

Оваа година мотото е „Надгради ја твојата реалност“, а конференцијата првпат ќе биде поделена во два дена. Ќе почне со свечено отворање во вечер, во 19 часот. Потоа ќе следуваат пет кратки предавања од децата финалисти на минатогодишниот конкурс за извонреден научен потенцијал „Иван Ќостаров“. Секое од овие предавања е под менторство на врвен македонски научник што работи во странство, со што ќе се истакне и разновидноста на научниот талент од Македонија.

Вечерта ќе продолжи со предавање на проф. Бас Рокерс (NYU Abu Dhabi) за виртуелната реалност и нејзиниот потенцијал да го трансформира начинот на кој децата учат и истражуваат, а ќе се доделат и годинашните награди за извонреден научен потенцијал „Иван Ќостаров“ и за најдобар млад презентер „Колега Стиков“.

Утре ќе се одржи изложбата „Parlez-vous fran-sci?“ во соработка со Францускиот институт во Скопје, а ќе бидат организирани и три научни работилници за ученици на возраст од 10 до 15 години. За време на работилниците децата ќе истражат еден научен концепт во виртуелна реалност, пред да имаат практична демонстрација на тема електромотори, капиларна активност или француска наука. Работилниците ќе траат од 10:30 до 14:30 часот.

Конференцијата и оваа година е финансирана од С(ц)иеста заедницата која ја сочинуваат над 300 научници родени во Македонија, посочуваат организаторите. мч/вг/

фото: плакат