17 март 2024

Јутарњи лист

Во раните утрински часови на 12 март руските медиуми алармираа за голема тревога. Неколку украински воени единици составени од руски доброволци се обиделе да преминат од Украина во Русија.

Руското Министерство за одбрана пред два дена тврдеше дека спречило обид на Киев за пробивање на граничната територија во регионите Белгород и Курск, додавајќи дека упадот се случил истовремено во три правци. Во меѓувреме, операциите се уште се во тек. Милициите против Кремљ тврдат дека го зазеле селото Тјоткино во областа Курск, што е доказ за видеата на социјалните мрежи, но Москва вели дека ги одбила нападите, нанесувајќи му големи загуби на непријателот. Кремљ го обвини Киев за нападите, пренесува Јутарњи лист.

Иако ова не е првпат единиците составени од Руси кои се борат за Украина да преминат на руска територија, овојпат нова воена формација за првпат влезе на руска територија од Украина.

Сибирскиот баталјон беше на обука цела зима и е трета воена единица што Украина ја формираше за руските граѓани кои сакаат да се приклучат во борбата против Кремљ, пишува Киев Индипендент. Како што пишуваат, баталјонот првенствено бил наменет за етничките малцинства од Сибир, вклучувајќи ги Бурјатите, Јакутите, Туванците и други.

Огромниот руски регион на северот на Азија, кој опфаќа 77 отсто од територијата на Русија, е дом на бројни национални малцинства кои во голема мера беа обесправени од руската држава, тврди Киев Индипендент. Експертите тврдат дека приклучувањето на новата руска единица кон вооружените сили на Украина повеќе служи за информативна војна отколку што придонесува за зголемување на воените капацитети на земјата во војна.

„Руските доброволни баталјони кои се борат заедно со Украинците е аспект на војната што нема да има големо значење на првата линија, но ќе има непропорционално влијание во однос на информативните активности, моралот и влијанието врз руското население и неговото раководство“, вели Кир Гајлс, виш советник во Програмата за Русија и Евроазија во Чатам Хаус.

Во зимските месеци, дописник на Киев Индипендент посети полигон во близина на Киев што го користеше новоформираниот Сибирски баталјон, единица во состав на регуларните вооружени сили на Украина. Мажите беа на активна обука со недели, чекајќи го повикот да бидат испратени на фронтот да ја одбранат Украина од земјата што некогаш била нивен дом. Од почетокот на руската инвазија на Украина, многу руски граѓани ја напуштија својата татковина, се населиле во странство, а неколку доброволно се приклучиле на украинската армија. 

„На крајот на 2022 година постигнавме договор со Меѓународната легија на украинските вооружени сили за редовно регрутирање, прво во рамките на рускиот волонтерски корпус, а од 2023 година со Сибирскиот баталјон и се обидуваме да регрутираме од 20 до 25 доброволци месечно“, рече Денис Соколов, ко-основач на Граѓанскиот совет, руска организација во егзил, која помага да се регрутираат руски граѓани да се борат за Украина. Доколку првичниот скрининг резултира со позитивен исход, волонтерот е подложен на долготрајна проверка пред да потпише договор и да се приклучи на следната група регрути на пат за Украина. 

За време на скринингот, кој може да трае со месеци, на кандидатите им се држат онлајн предавања за тактичка медицина и им се обезбедува основна опрема. Сите доброволци се цивили, а ниту еден од кандидатите не е поранешен војник или воен затвореник во Украина. За десетици мажи кои го положија тестот, започнува фазата на тренирање. Обучувачот на баталјонот, Украинец од Киев со прекар Батја, помина повеќе од една година на линијата на фронтот, каде што неколку пати беше ранет.

„Тие стануваат воен персонал со договор, исто како и секој друг војник. Секој борец е регистриран во вооружените саги пред да биде испратен на фронтот“, рече тој. За многу Украинци, градењето доверба со Русите, дури и оние кои се борат против Кремљ, не е проблем.

„Поминувам многу време со нив. Ние сме браќа по оружје, одиме заедно да се бориме. Да имав и најмал сомнеж во нив, немаше да го сторам тоа. Верувам дека го имаат мојот грб, 100 отсто“, рече тој. Мали (22) е Башкирец. Тој израснал помеѓу реката Волга и Урал, и одлучил да се бори на страната на Украина пролетта 2023 година. Перун (32) е поранешен инженер од Москва кој ги прекинал семејните врски со своите роднини во Русија и решил да се приклучи на баталјонот со цел да и помогне на Украина да ја победи Русија. Неговата девојка е Украинка со која се запознал во Доњецк во 2013 година, една година пред руската окупација.

„Планирам да останам во оваа прекрасна земја“, рече тој. Јасно му е дека никогаш не смее да се врати во Русија. „Престанав да комуницирам со моите пријатели во Русија. Чувствувам дека повеќе немам ништо со таа земја“.

Џони (32) ја напушти Русија во февруари 2022 година. Прво се населил во странство, пред пријателите да му помогнат да се поврзе со Граѓанскиот совет. Во октомври се приклучил на сибирскиот баталјон. Неговото семејство сè уште не знае дека се бори за Украина, а Џони е разочаран од оние што останале во Русија. „Мислев дека ќе има револуција во Русија кога започна мобилизацијата - згрешив. Бев против режимот на Путин дури и на училиште“, рече тој.

Нема враќање во Русија за луѓе како Мали, Перун и Џони. Веднаш би биле уапсени и кривично гонети како предавници. Тие се под надзор во Украина и ќе мора да ја докажат својата лојалност ставајќи го својот живот на линија, пишува Киев Индипендент. Иако единиците официјално се дел од вооружените сили на Украина, украинските власти се обидуваат да го минимизираат учеството на Украина во операциите на овие единици на руска територија.

„Легијата на слободата на Русија, рускиот волонтерски корпус и Сибирскиот баталјон дејствуваат на територијата на Русија како независни единици, бидејќи се состојат од руски државјани. Покрај тоа, тие се дома“, рече Андриј Јусов, портпарол на украинската разузнавачка служба, по рацијата на 12 март.

Упадите на руска територија често се толкуваат како трик за публицитет - со цел да се испрати сигнал до рускиот народ и население и да се поттикне регрутирање. „Ова е дел од комбинираната и координирана информативна кампања на Украина за туркање на руското раководство до провалија. Украина врши психолошки и информативен притисок и го тера руското раководство да погодува без оглед на значењето на упадите во Русија“, тврди Гајлс.

Истовремено со упадите на доброволните единици во пограничните региони, Украинците веќе неколку дена по ред вршат опсежни напади со беспилотни летала врз рафинериите и енергетската инфраструктура, а погодена е и зградата на руската служба за безбедност ФСБ во Белгород. паг/

Фото: МИА архива