Крива Паланка, 28 декември 2023 (МИА) - Отсекот за превенција на ОВР Крива Паланка и локалниот совет за превенција со превентивни едукативни работилници против употреба на пиротехника како дел Кампањата „Петарди не – безбедност пред сè“ опфатиле над четиристотини млади, основци и средношколци од општината.

Од Одделението за внатрешни работи Крива Паланка информираат дека во пресрет на новата година преку предавања, делење флаери и презентација на видео-материјали упатена е јасна порака до младите за тоа кои се опасностите и последиците од употреба на пиротехника.

Во средното општинско училиште "Ѓорче Петров" присуствуваа и лекари и студенти на медицинскиот факултет кои детално им укажаа на учениците од прва година за последиците по здравјето,пред сѐ, од употребата на петарди и други пиротехнички средства.

Целта на кампањата на МВР "Петарди не - безбедност пред сѐ", е да се стигне до секое дете, секој родител и секој човек за заеднички да се стави крај на опасностите од употреба пиротехнички средства.

Кампањата е реализирана и во подрачните училишта во Општина Крива Паланка, во селата Конопница, Мождивњак и други, а од отсекот за превенција и локален совет за превенција апелираат да се почитуваат препораките и укажувањата од страна на службите на МВР за да се превенираат несакани последици. ад/сст/

Фото Локален совет за превенција Крива Паланка