Загреб, 10 јануари 2024 (МИА) - Измените на Кривичниот законик со кои се предвидува воведување на фемицид како независно кривично дело под име тешко убиство на женско лице, треба да и бидат претставени на Владата на Хрватска најдоцна до крајот на јануари, пишува денеска „Јутарњи лист“. 

Судејќи според одговорите на Министерството за правда на приговорите на законот добиени во јавната расправа од невладини здруженија, судии и правобранителства, првичната дефиниција за делото ќе се прошири и делото нема да се однесува на секое убиство на блиско женско лице, како што било планирано, но на родово засновано убиство на женско лице.

Истовремено, „родово засновано насилство“ ќе биде дефинирано во членот 87, кој ги дава значењата на одредени термини во Кривичниот законик (како што се дефинициите за кривични дела од омраза, имотна корист или службена тајна), кои целосно ќе бидат преземени од Истанбулската конвенција.

Во членот 3, Конвенцијата пропишува дека „родово засновано насилство врз жените значи насилство насочено кон жена затоа што таа е жена или што несразмерно ги погодува жените“. Но, покрај воведувањето фемицид, во Кривичниот законик ќе се менува и текстот на написот со кој се дефинира секое тешко убиство, без разлика на полот на жртвата, се вели во одговорот на Министерството за правда.

Сега во ставот 3 од описот на тоа дело е предвидено дека тој што ќе „убие блиско лице кое претходно го малтретирал“ ќе се казни со казна затвор од најмалку десет години или со долгогодишен затвор. Противниците на воведувањето фемицид, вклучително и голем број судии, за време на јавната расправа предупредија дека со оваа постоечка дефиниција во Кривичниот законик, на Хрватска не и треба фемицид како посебно дело и дека такво дело би било дискриминаторски кон сите машки жртви.

Пратеникот, пак, одговори дека судската пракса покажува дека судиите исклучително ретко прибегнувале кон ваква квалификација на делото во случаите на убиства на жени, а и кога тоа го правеле изрекувале најблаги казни. Сега оваа ставка ќе биде поделена на два посебни ставки, а тешкото убиство како квалификуван облик може да се изврши на штета на блиско лице и на штета на секое лице (не мора блиско) кое сторителот претходно го злоставувал, наведува „Јутарњи лист“. мс/

фото: МИА архива