Киев, 15 октомври 2024 (МИА) – Анкета на Меѓународниот институт за социологија во Киев покажа дека четири петтини од Украинците го поддржуваат новиот закон за забрана на верските заедници поврзани со Русија.

Украинската православна црква (УПЦ) со години се соочува со обвинувања дека е „инструмент на влијание на Москва“ во Украина и оти дел од нејзиното свештенство соработува со руските разузнавачки служби.

UPC ги негира овие наводи и тврди дека во мај 2022 година официјално ги прекинала сите врски со Руската православна црква, која била нејзината мајка црква.

Во август, Украина усвои закон за забрана на Руската православна црква од украинска територија и наведе дека владина комисија ќе состави список на организации „поврзани“ со Руската православна црква.

Пратениците рекоа дека процесот на забрана на УПЦ ќе биде долг и комплициран, бидејќи секоја парохија на УПЦ е индивидуално правно лице и ќе има девет месеци да одлучи дали сака да ја напушти црквата.

Во анкетата, 16 отсто од Украинците се изјасниле дека се против забраната, додека четири отсто „не се сигурни“, а 80 отсто биле „за“.

Десетици свештеници на УПЦ беа уапсени и судени под обвинение за предавство и соработка со Русија. УПЦ соопшти дека е „жртва на лов на вештерки“.

Пратениците во Естонија и Чешка, исто така, оваа година изразија загриженост за влијанието на Москва преку Руската православна црква во нивните земји. јт/

Фото: Фејсбук на УПЦ