- Од страна на државен инспекторат за животна средина стапено е во контакт со овластен министер за инспекциски работи на Република Србија, тие имаат подрачна единица Прешево и во текот на денот треба да се добијат информации, од нивна страна ќе бидеме ние правовремено информирани што се случува со таа инсталација, која се наоѓа во близина на Прешево. Наши колеги од Србија на мене ми пратија слика од таа инсталација, мислам дека ќе се реши, изјави раководителот на секторот за инспекциски надзор, Бобан Бојковски. Жителите на Табановце кое се наоѓа во непосредна близина на Србија велат дека неподнослива миризба се шири во селото, а после неколку часа се чувствува и во Куманово. - Се чувствува голема непријатна миризба на запалени гуми, прагови, мислам дека доаѓа од српската граница, од тој реон и се шири навака. Чад не се гледа, меѓутоа надвор не се седи. Непријатен е мирисот, не се дише, на запалени гуми, асфалт. Тоа доаѓа од пределот на Србија, од Прешево, мислам дека се пали нешто, рече Игор Томиќ, жител на кумановското село Табановце. Загадувањето го покажаа дел од мерните станици поставени во Куманово. Куманово со години наназад е на врвот на општини со високо ниво на аерозагадување. Изминативе години општината пред пандемијата донесе сет на краткорочни, среднорочни и долгорочни мерки за намалување на аерозагадувањето, меѓу нив клучна, гасификацијата на повеќе установи, а помеѓу нив и на болницата, која веќе е завршена. ам/ар/