Атина, 26 септември 2025 (МИА) - Меѓународна флотила што носи хуманитарна помош за Газа треба да ги напушти грчките води и да се упати кон палестинската енклава денеска, и покрај предупредувањата од Израел дека ќе ги искористи сите средства за да го блокира пристапот на бродовите до воено разорената Газа.

Флотилата „Глобал Сумуд“ е составена од околу 50 цивилни бродови, а нејзините организатори велат дека целта е да се достави хуманитарна помош, но и да се „испрати порака за солидарност и надеж до палестинскиот народ“.

Израел соопшти дека флотилата нема да помине и ги обвини организаторите дека го поддржуваат палестинското милитантно движење Хамас.

Грција гарантира безбедно поминување на флотилата во нејзините територијални води, додека Италија и Шпанија испраќаат бродови за да ги заштитат своите граѓани.

Италија предложи компромис со кој помошта би била доставена до Кипар, а потоа дистрибуирана во Газа преку Латинскиот патријарх на Католичката црква во Ерусалим, што флотилата го отфрли.

Флотилата се соочува со ризик од механички проблеми и можни судири, а италијанското Министерство за надворешни работи ги предупреди членовите на флотилата дека ја продолжуваат мисијата на свој ризик.

Организаторите велат дека сакаат да испратат „силна порака дека светот е со Палестина“. мс/

фото: ЕПА архива