ЕУ издвои 1,2 милиони евра хуманитарна помош за жртвите од циклонот во Бангладеш и Индија
- ЕУ оддели 1,2 милиони евра хуманитарна помош за справување со последиците од ударот на тропскиот циклон Ремал во Бангладеш и Индија.
![ЕУ издвои 1,2 милиони евра хуманитарна помош за жртвите од циклонот во Бангладеш и Индија](https://mia.mk/images/20240603142142_big_730x400_56.webp )
Брисел, 3 јуни 2024 (МИА) - ЕУ оддели 1,2 милиони евра хуманитарна помош за справување со последиците од ударот на тропскиот циклон Ремал во Бангладеш и Индија.
Како што соопшти ЕК, помошта е наменета за решавањето на најитните потреби на погоденото население во југозападен Бангладеш, во областа Кокс Базар на југоистокот од земјата и во индиската држава Западен Бенгал, како што се обезбедување објекти за сместување, пристап до вода и тоалети и други основни потреби за луѓето кои ги загубија своите домови во невремето.
- Сите хуманитарни средства се канализираат непристрасно преку сертифицирани партнери, како што се агенциите на ОН, меѓународните невладини организации и Меѓународниот комитет на Црвениот крст и Црвената полумесечина, се наведува во соопштението.
Според еврокомесарот за управување со кризи Јанез Ленарчич оваа помош ќе ја обезбеди потребната поддршка за најпогодените жители, пред се во Бангладеш.
- Ние, исто така, остануваме посветени за помош на погодените бегалци Рохинџи, кои веќе живеат во многу тешка ситуација во Кокс Базар, како и на нивните домаќини, додаде Ленарчич. сп/
Фото: МИА Архива