Софија, 20 јуни 2025 – Предизвиците со кои се соочува образованието беа дискутирани на панелот „Трансформирање на високото образование преку иновации и истражување“ во рамките на Green Transition Forum 5.0, со учество на водечки експерти од образовните и научните области.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

„Најголемиот предизвик со кој се соочува секоја образовна институција е како да ги подготви студентите за професиите на иднината, за кои не ни знаеме дека ќе постојат за 10, 15, 20 и повеќе години“, рече проф. Миглена Темелкова, претседателка на Советот на ректори во Бугарија. Таа истакна дека сега се создаваат кадри на идниот економски систем, кои мора да се едуцираат за интердисциплинарност, а не само да бидат специјалисти во една област.

Дописниот член Евелина Славчева, претседател на Бугарската академија на науките (БАН), ја истакна важноста на фундаменталното знаење и научното истражување. „Без разлика колку иновациите се инспиративни, за да се случат им треба основа, фундаментално знаење и фундаментално научно истражување“, рече таа. Дописниот член Славчева истакна дека новите технологии често се во центарот на вниманието, но зад нив лежат долгорочни и понезабележливи научни истражувања кои бараат време, тишина и длабинска работа.

Милена Стојчева, министерка за иновации за периодот од 2023 до 2024 година, ја истакна потребата од креирање одговорен пристап кон новите технологии. „Вештачката интелигенција е едноставно новиот, следен бран на висока технологија. Како што беше интернетот порано, сега е вештачка интелигенција (ВИ)“, рече таа. Стојчева повика на долгорочна визија во областа на вештачката интелигенција и нагласи дека мора да се размислува каков ќе биде ефектот на новата технологија за 10-20 години.

За време на дискусијата, д-р Момчил Карпузанов, академски директор на магистерските програми на Американскиот универзитет во Бугарија (AUBG), ја сподели својата загриженост за употребата на вештачката интелигенција во образованието. „Јас лично сум крајно критичен кон премногу либералниот пристап што може да го преземат многу од нашите студенти. Со секој бран на ентузијазам, критичкото размислување е уште позадолжително“, рече тој. Карпузанов нагласи дека додека вештачката интелигенција има иднина во образованието, идните студенти и ученици треба да ги вежбаат своите вештини за критичко размислување на ист начин како што спортистите ги вежбаат своите мускули за натпреварување.

Проф. Елена Радева, професорка за бизнис администрација на Американскиот универзитет во Бугарија (AUBG), го претстави својот пристап за користење на вештачката интелигенција во образованието. „Бев многу среќна кога вештачката интелигенција влезе во нашите животи и воопшто не бев загрижена. Тоа едноставно беше можност да ја преиспитам мојата наставничка работа и да се уверам дека развивам нешто што е најважно за мене – критичко размислување“, рече таа. Радева истакна дека вештините за критичко размислување се нешто што таа се стреми да го развие во училницата. „Ако немаат критичко размислување и немаат висока етика, јас воопшто не се занимавам со предавање на студентите“, додаде таа.

Георги Георгиев, програмски директор на Elevate Accelerator, истакна дека е важно на младите да им се даде карт-бланш и да не се плашат да не успеат. „Без разлика колку пати не успеете, ако не се откажете, можеби звучи малку банално, но нема да пропаднете. Само имате лекции што ги учите“, рече тој.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.