Крива Паланка, 31 декември 2024 (МИА) - Спектакуларното пристигнување на Дедо Мраз на градскиот плоштад во Крива Паланка го затвори годинашното издание на „Новогодишен базар" во „Градот на културата за 2024".

Денот почна со програмата за најмладите, извонредно новогодишно шоу со жонглерите Панто Мето и Ѓурчиновски, а забавата продолжи со настапот на Пајак,кој ги разигра и развесели младите.

За присутната повозрасна публика, музика за душа и одлично расположение приредија „Пауза за ракија“.

Од Општина Крива Паланка велат дека сите што денеска во огромен број беа на градскиот плоштад, уживааа во најубавото попладне годинава за спектакуларно заокружување на 2024 со најголемата, и највесела забава.

Присутните ги поздрави градоначалникот на Крива Паланка, Сашко Митовски.

-Од секоја страна детски џагор, насмевки, среќни лица, идеална слика за заокружување на програмата на Новогодишен базар, но не постои поубава глетка по која ќе биде запаметен последниот ден од 2024, од оваа ведра и насмеана слика од преполниот градски плоштад. Ова е најголемото задоволство и најголемата потврда за нашето работење , а тоа е фактот дека и вие сте среќни и задоволни. Драго ми е што базарот и целокупната програма организирана изминатата недела придонесе буквално секој ден овде, на плоштадот, да владее прекрасна празнична атмосфера. Нешто што стана препознатлив начин на живеење на Крива Паланка во пресрет на Новата година, со уникатното новогодишно украсување, со програма за сите граѓани,од најмладите,до највозрасните. Сите што периодов се во градот или доаѓаат наменски,за концертите и забавата што ја организираме, имаа можност да уживаат во настапите на Калиопи, Слаткар, Камерен оркестар на Битола со Наде Талевска и Ристо Самарџиев, Сара Мејс, бројните артисти, жонглери, магионичари, базар од училиштата. Едноставно, градот живее со полн ритам. Градот е полн туристи, а граѓаните се среќни.Нема што повеќе да се посака во пресрет на новата година, освен да им посакам на сите многу здравје, среќа и љубов од ближните во новата 2025 година, рече Митовски.

Дедо Мраз повторно ги изненади и израдува сите дечиња, постигнувајќи на уникатен и оригинален начин, со параглајдер.

Новогодишен базар 2024 траеше од 26 до 31 декември.ид/бт/

Фото: МИА