Скопје, 14 март 2023 (МИА) - Општина Центар заедно со Францускиот институт во Скопје денеска организираа омаж во чест на 100-годишнината од раѓањето на литературниот великан Ацо Шопов.

На свеченоста која се одржа во Музејот на македонската борба за независност присуствуваа бројни гости меѓу кои амбасадорот на Република Франција Сирил Бомгартнер, министерот за локална самоуправа Ристо Пенов, Филип Тосевски, државен секретар во Министерството за надворешни работи, Иго Бештел, директор на Францускиот институт, сопругата на поетот Светлана Шопова и други.

Градоначалникот на Општина Центар, Горан Герасимовски во своето излагање потенцираше дека преку овој настан општината сака да ја акцентира вредноста на поезијата на Шопов кон македонската литература.

-Кратко е времето за да ги опфатме сите вредности кои го сочинуваат животот и делото на Шопов: неговото учество во НОБ, продукцијата на првата повоена книга на македонски јазик, воспоставувањето на фестивалот Струшки вечери на поезијата, но и неговите дипломатски и литературни ангажмани. Од ова одбележување очекуваме да го доближиме опусот на Шопов до најмладите поетски таленти, кои денес се тука со нас и со тоа, да го дадеме нашиот придонес кон продолжувањето на развојот на македонската поезија, рече Герасимовски пред присутните.

Како што соопштуваат од општинската прес-служба, тој потенцираше дека црпејќи инспирација од македонското народно творештво и водејќи се од Рацин, генијалноста на Шопов, лежи во успехот да создава постојано модерна поезија со траен современ сензибилитет. И денешната заедничка организација на церемонијата се должи токму на врската од збогатувањето на нашата литература со преводите на литературни дела од други јазици.

-Со оваа формула Шопов ги прошири границите на македонската литература сместувајќи ја како трајна вредност во книжевностите на европските земји, како што е француската литература. Затоа наша заедничка обврска е зачувување на неговата оставнина, со ветување за наше понатамошно создавање на идни настани и манифестации во чест на Ацо Шопов, рече Герасимовски.

Со поетско рецитирање манифестацијата ја збогатија студенти од Филолошкиот факултет, додека со спектакуларна изведба на пијано настанот го затвори 12-годишната Петра Митровиќ. Митровиќ е стипендист на Општина Центар-Скопје од областа на културата која има освоено единаесет први места на светски натпревари и одржано солистички концерти во катедралата Нотр Дам во Париз и Карнеги Хол во Њујорк.фф/лв/

Фото: Општина Центар