Софија, 25 февруари 2024 - Мојата земја е подготвена да биде домаќин на самит во рамките на процесот „Акаба“, изјави вицепремиерката и министерка за надворешни работи на Бугарија Марија Габриел на брифинг во Аман по средбата со нејзиниот јордански колега, вицепремиер и министер за надворешни работи Ајман ал Сафади.

Ова е веста на денот од Република Бугарија, избрана на Бугарската телеграфска агенција (БТА) за објавување од МИА, согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат директно избрана од другата агенција вест на денот на соодветната земја, а другата агенција да ја објави на својот интернет сајт без промени со изрично посочување и цитирање на партнерот како извор.

Габриел е во официјална работна посета на Јордан.

Процесот „Акаба“ е серија меѓународни состаноци иницирани во 2015 година од страна на јорданскиот крал Абдула Втори со цел зајакнување на меѓународната и регионалната соработка против тероризмот, радикализацијата и насилниот екстремизам. Во 2019 година, при посетата на тогашниот премиер Бојко Борисов на Аман, со јорданскиот крал Абдула Втори беше договорено средбата на процесот во 2020 година да биде во Софија. Поради пандемијата на Ковид-19, форумот беше одложен.

„Ги цениме и поддржуваме иницијативите на Јордан во областа на безбедносната и одбранбената соработка во борбата против тероризмот и радикализацијата. За време на дискусиите, ја потврдивме нашата посветеност за дополнително зајакнување на политичкиот дијалог и одржување на следната рунда политички консултации оваа година“, изјави Габриел.

Вицепремиерката и министерка за надворешни работи истакна дека Јордан е важен партнер на Бугарија во регионот на Блискиот Исток и посочи дека претстојната 60-годишнина од воспоставувањето на дипломатските односи меѓу двете земји во октомври е добар повод за покренување нови иницијативи.

Како главни пораки од денешната средба Габриел ги издвои продлабочувањето на политичкиот дијалог, идентификувањето на стратешките области за зајакната соработка и координацијата на напорите.

Вицепремиерката истакна дека се разговарало и за потенцијалот за економска, комерцијална и инвестициска соработка. „Заедничката комисија за економска соработка е важен механизам за активирање на нашето партнерство во различни области од економијата. Подготвени сме оваа година да бидеме домаќини на состанокот на Комисијата“, рече Габриел.

Таа додаде дека се разговарало и за продлабочување на соработката во областа на информатичко-комуникациските технологии врз основа на технолошкиот развој во Јордан во последните години, како и за желбата на Бугарија да се етаблира како водечка дестинација за научно истражување и иновации.

Габриел посочи дека се разговарало и за соработка во областа на туризмот.

„Вашата историја, култура и гостопримство ги привлекуваат погледите на целиот свет“, изјави Габриел. Според неа, отворањето на директен лет од Софија до Аман ќе ги прошири тие можности не само за бугарските, туку и за јорданските туристи.

Во однос на програмата за соработка во областа на образованието, науката и културата, потпишана меѓу двете земји во јули минатата година, таа рече дека „дава механизам за ефикасна меѓународна образовна размена“. „Ќе продолжиме да работиме во оваа област“, рече Габриел.

Според неа, студентската размена е најдобриот начин за зајакнување на контактите меѓу луѓето, за подобро запознавање. „Се сеќаваме на времето кога многу јордански студенти дипломираа на универзитетите во Бугарија. Тие се најголемиот мост меѓу нашите земји и нашите култури“, додаде Габриел.

„Сите сакаме да видиме хуманитарна помош за Газа“, рече таа, нагласувајќи дека го поддржува решението за две држави. „Бугарија го поддржува решението засновано на принципот на две држави - Израел и Палестина“, рече Габриел.

Вицепремиерката посочи дека Јордан се докажал како регионален фактор за зачувување на мирот и Бугарија ги поздравува напорите во оваа насока.

Ова е веста на денот од Република Бугарија, избрана на Бугарската телеграфска агенција (БТА) за објавување од МИА, согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат директно избрана од другата агенција вест на денот на соодветната земја, а другата агенција да ја објави на својот интернет сајт без промени со изрично посочување и цитирање на партнерот како извор.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА