Американскиот амбасадор во Кина го обвини Пекинг дека го прави „невозможно“ зајакнување на врските меѓу обичните Кинези и Американци во интервју објавено денеска во Волстрит џурнал.

Кина и САД се расправаа во последниве години за низа прашања од трговија до технологија, човекови права и војната во Украина. Односите донекаде се стабилизираа откако претседателот Џо Бајден се состана со својот кинески колега Си Џинпинг во Сан Франциско минатата година, но тензиите продолжуваат меѓу двете најголеми економии во светот.

Амбасадорот Николас Барнс изјави за Волстрит џурнал дека Пекинг се обидува да го прекине ангажманот меѓу кинеските и американските граѓани, заплашувајќи ги кинеските учесници во настани во амбасадата и поттикнувајќи антиамерикански жар на интернет.

-Тие велат дека се за повторно поврзување на нашите две популации, но преземаат драматични чекори за да го оневозможат тоа, изјави Барнс за весникот.

Тој рече дека кинеските власти вршеле притисок врз граѓаните да не присуствуваат на 61 јавен настан организиран од амбасадата од ноември, и се обиделе да ги заплашат оние што го направиле тоа, вклучително и со доцните ноќни испрашувања во нивните домови.

-Ова не е само епизодно. Ова е рутина. Ова е речиси секој јавен настан, рече тој.

Барнс, исто така, рече дека „не е задоволен“ од нивото на транспарентност околу мотивите на човекот кој избоде четворица американски инструктори од колеџ во североисточниот кинески парк овој месец.

Тој изрази загриженост за „многу агресивната кинеска влада... напорите да ја оцрни Америка, да раскаже искривена приказна за американското општество, американската историја, американската политика“.

-Тоа се случува секој ден на сите мрежи што и се достапни на владата овде, и има висок степен на антиамериканизам на интернет, рече Барнс.

Пекинг често се жали дека Вашингтон го ограничува движењето на своите дипломати со седиште во САД и жестоко испрашува или депортира некои кинески носители на валидни американски визи. мс/

фото: МИА архива