Јануари 2024 година најтоплиот во историјата на мерењето на температурата
- Јануари 2024 година е најтоплиот во историјата на набљудувањата на времето и климата, објави денеска Светската метеоролошка организација (СМО).
![Јануари 2024 година најтоплиот во историјата на мерењето на температурата](https://mia.mk/index.php/images/20240215175704_big_730x400_26.webp )
Женева, 15 февруари 2024 (МИА) - Јануари 2024 година е најтоплиот во историјата на набљудувањата на времето и климата, објави денеска Светската метеоролошка организација (СМО).
-Трендот на уривање рекорди што беше забележан во поголемиот дел од 2023 година продолжи и во 2024 година - јануари беше најтоплиот јануари досега, соопшти организацијата.
Според СМО, тоа е осми месец по ред кој е најтопол досега.
-Температурите на површината на морето се на рекордно високо ниво, десет месеци по ред, соопшти СМО.
Просечната месечна температура на воздухот била за 1,66 степени повисока од јануарски просек во периодот од 1850-1900 година, додека во периодот од 1991-2020 година била 0,70 степени над просекот за јануари.
Според податоците на Службата за климатски промени Коперникус, во споредба со температурата од претходниот најтопол јануари 2020 година, просечната месечна температура беше над 0,12 степени.
Организацијата ги наведе податоците добиени од американската Национална администрација за океани и атмосфера НОАА (NOAA), НАСА, службата за климатски промени Коперникус на Европската унија и Јапонската метеоролошка агенција. мс/
фото: МИА архива