Милано, 20 јануари 2026 (МИА) - Напаѓачот на Милан, Никлас Филкруг, покажа вистинска отпорност, постигнувајќи го својот прв гол за италијанскиот клуб и покрај повредата. Неговиот прецизен удар во неделата им донесе на „росонерите“ тесна победа од 1-0 над Лече во 21. коло од Серија А.

По натпреварот, 32-годишниот германски напаѓач потврди дека играл со скршен прст. 

- Не е тајна. Само треба да се справам со болката и ситуацијата. Јас сум Германец. Ние сме силни, можеме да се справиме со болката. Ќе го надминам тоа, не сакам да пропуштам уште еден натпревар за Милан, рече Филкруг во интервју за „Скај Спорт Италија“.

Претходно беше објавено дека на играчот ќе му требаат околу две недели за да закрепне од повредата, но тој одлучи да му помогне на тимот во важен натпревар.

Филкруг му се придружи на Милан како позајмен играч од Вест Хем на 2 јануари. Овој гол беше негов прв во пет натпревари со италијанскиот тим. зс/

Фото: ЕПА