Предлог-финансискиот план на РКЕ за 2024 помина на собраниската Комисија за економски прашања
- Предлог-финансискиот план на Регулаторната комисија за енергетика за 2024 година го помина првиот собраниски филтер на Комисијата за економски прашања.
![Предлог-финансискиот план на РКЕ за 2024 помина на собраниската Комисија за економски прашања](https://mia.mk/index.php/images/20240201165608_big_730x400_16.webp )
Скопје, 1 февруари 2024 (МИА) - Предлог-финансискиот план на Регулаторната комисија за енергетика за 2024 година го помина првиот собраниски филтер на Комисијата за економски прашања.
Претседателот на РКЕ Марко Бислимоски во образложението рече дека се предвидува намалување за 20 отсто на надоместот преку кој се финансира работењето на Комисијата во однос на минатата година.
Вкупните приходи на РКЕ се проектирани на 230 милиони денари од кои 80 милиони, како што посочи Бислимоски, се заштеди од претходните години поради рационално и економично работење. Токму тие средства ќе бидат наменети за купување на дополнителен простор во зградата во која и сега работи РКЕ поради зголемените надлежности и доекипирање.
Пратениците од опозицијата не се согласија со Предлог-финансискиот план, а во своите излагања се осврнаа и на цената на струјата која според нив не е точно дека не е зголемена.
Членовите на Комисијата ја усвоија и Предлог-одлуката за утврдување на процентот на зафаќање од вкупниот годишен приход за финансирање на работењето на Регулаторната комисија за енергетика за 2024 година. бак/дма/
Фото: МИА архива