Лондон, 14 март 2025 (МИА) - Пет руски државјани се наоѓале на контејнерскиот брод „Соулонг“, кој оваа недела удри во американски танкер закотвен во близина на брегот на североисточна Англија, објавија агенциите, повикувајќи се на Руската амбасада во Лондон.

Дипломатското претставништво потврди дека 59-годишниот капетан, кој беше уапсен од британската полиција под сомнение за убиство од небрежност, е Русин.

Контејнерскиот брод „Соулонг“ под португалско знаме без очигледна причина удри во поголемиот танкер „Стена Имакјулот“ кој превезуваше авионско гориво за американската војска.

Еден од членовите на екипажот е исчезнат и се претпоставува дека е мртов, потсетуваат агенциите. Останатите 36 преживеале.

Британската полиција во меѓувреме објави дека добила повеќе време за да го испраша 59-годишниот руски капетан на контејнерскиот брод.

Русинот од понеделникот е приведен во полиција поради сомнение за убиство од небрежност.

Британската полиција соопшти дека судот им дал уште 24 часа да го задржат мажот во притвор, покрај претходното 36-часовно продолжување на неговиот притвор - барање кое го аргументирала со сложеноста на случајот. рп/

Фото: МИА архива