МВР Билтен (ДПЛ)

Скопје, 13 ноември 2024 (МИА) - Полициски службеници од СВР Битола вчера по претходно добиена наредба за претрес од Основниот суд од Битола извршиле претрес во домот на А.Ј.(35) каде нашле и одземени дозвола за оружје, 91 патрони за ловна пушка, 39 куршуми различен калибар, топовски удар, делови за оружје, како и различни предмети кои потекнуваат од извршени кривични дела.

А.Ј. бил приведен во полициска станица Битола и по документирање на настанот против него ќе следува соодветна пријава.

Вчера во 17:10 часот на улицата „Џумајска“ во Скопје, полициски службеници од Оперативниот тим потраги при СВР Скопје го лишија од слобода Д.Б. (45) од Скопје, кој бил баран по централна потерница врз основа на наредба од Основниот кривичен суд Скопје за затворска казна во траење од 20 години, во врска со повеќе кривични дела.

Кај него се пронајдени фалсификувани хрватска патна исправа, лична карта и возачка дозвола. Д.Б. ќе биде предаден на надлежната казнено поправна установа.

Во неделата во 14 часот, по претходно издадена наредба од Основниот суд Кавадарци, од страна на полициски службеници од ОВР Кавадарци бил извршен претрес во викендица на Тиквешкото езеро во сопственост на С.П.(45) од Кавадарци каде е пронајдена малокалибарска пушка „Брно-мод2“ и оптички нишан „Гамо“ кои ги поседувал без дозвола.

С.П. е лишен од слобода, а за случајот известен е јавен обвинител и по документирање на настанот против него ќе биде поднесена соодветна пријава.

Вчера во 16:10 часот во ОВР Гостивар било пријавено дека на улицата „Фазaнерија 2“ се случила сообраќајна несреќа меѓу патничко возило „рено“ со гостиварски таблици, управувано од малолетник од Гостивар и велосипед управуван од малолетно лице од Гостивар.

Во незгодата со тешки телесни повреди се здобил велосипедистот, констатирани во Ургентен центар- Гостивар. Увид на лице место извршила екипа од ОВР Гостивар.

ОВР Струга поднесе кривична пријава против С.В.(42) од Охрид поради основи на на сомнение за сторено кривично дело „телесна повреда“.

На 9 ноември на паркинг простор пред деловен центар во Струга, пријавениот физички ја нападнал неговата поранешна 30 – годишна девојка.

СВР Тетово поднесе кривична пријава против М.М.(38) од Тетово поради постоење основи на сомнение за сторено кривично дело „телесна повреда“ во врска со семејно насилство.

На 21 октомври во семејниот дом, пријавениот физички ја нападнал неговата сопруга.

Надворешна канцеларија за криминалистички работи Берово, поднесе кривична пријава против М.К.(23) од Берово поради постоење основи на сомнение за сторено кривично дело „напад врз службено лице при вршење работи на безбедноста“.

На 26 август пред угостителски објект во Берово, пријавениот физички нападнал полициски службеник кој вршел службени дејствија.

СВР Битола поднесе кривична пријава против Д.К.(39) од Прилеп поради постоење основи на сомнение за сторено кривично дело „спречување на службено лице при вршење на работи од безбедноста“.

На 12 јули годинава на крстосница на улицата „Прилепски бранители“ и булеварот „Гоце Делчев“, пријавениот не застанал на знак за запирање, по што со возилото кое го управувал удрил полициски службеници додека извршувале службени дејствија и им нанел повреди.

СВР Тетово поднесе кривична пријава против Ѓ.Б.(56) од Тетово поради постоење основи на сомнение за сторено кривично дело „загрозување со опасно орудие при тепачка или караница“.

На 17 јули годинава, пријавениот со нож и секира се заканувал на малолетници.

Вчера во 14:30 часот во атарот на селото Радање, општина Карбинци, полициски службеници од СВР Штип по наредба на ОЈО Штип, во содејство со Трудова инспекција, извршиле контрола во правен субјект каде биле затекнати А.Р.(33), Л.Р.(59) , Ф.Л.(63) , Д.З.(42) , Б.З.(51) , А.Д.(36) и К.З.(59), сите од Република Албанија, за кои било констатирано дека престојувале незаконски во државата, а биле работно ангажирани во правниот субјект.

По целосно документирање на случајот ќе биде поднесен соодветен поднесок.

Вчера во 08:30 часот во СВР Скопје било пријавено дека на подрачјето на Бутел, настанал пожар во помошна просторија од куќа, сопственост на А.Н.(81) од Скопје, а пожарот се проширил и ја зафатил соседната куќа, сопственост на Љ.К.(68) од Скопје.

Повредени лица нема. Од Бригадата за противпожарна заштита Скопје пожарот бил изгаснат. Извршен бил увид од увидна екипа од СВР Скопје.

Ноќеска во 03:20 часот во СВР Скопје било пријавено дека на подрачјето на Кисела Вода, настанал пожар во угостителски објект, сопственост на Г.М. од Скопје.

Пожарот бил изгаснат. Повредени лица нема. Извршен бил увид од увидна екипа од СВР Скопје.

Вчера во 14:30 часот во СВР Скопје С.Љ.(45) од с.Сарај пријавил дека на 11 ноември околу 23 часот во казино на подрачјето на Карпош бил физички нападнат од Ф.А. и неговиот син Ф.А..