Мајами, 4 октомври 2020 (МИА) - Бам Адебајо и Горан Драгиќ можеби нема да се појават во натпреварот бр.3 за Мајами Хит против Лос Анџелес Лејкерс. Нивната состојба е опишана како „неизвесна“ во извештајот пред натпреварот, бидејќи обично кошаркарите со ваква дијагноза ги пропуштаат натпреварите на своите тимови. Адебајо, кој е стартен центар на тимот, се опоравува од повредата на вратот. Тој по вториот натпревар рече дека се надева дека ќе биде вклучен во ротацијата на тренерот Ерик Сполстра и рече дека се чувствува подобро. Со Драгиќ работите се посериозни, бидејќи тој има повреда на левиот глужд и треба да му се стават инјекции за да се појави на паркетот. Пред почетокот на натпреварот бр.2, Сполстра рече дека Адебајо и Драгиќ имаат став и желба да играат, но на крајот тој и неговиот стручен штаб решија да дадат време за опоравување на двајцата нивни главни кошаркари. Натпреварот бр.3 помеѓу Мајами Хит и Л.А. Лејкерс е вечерва во 01:30 часот по македонско време. Лејкерси водат со 2-0 во серијата, потребни им се уште два успеси за да го освојат трофејот.