Коњановски: Имаме акциски планови за седум клучни подрачја во Битола
- Гарантирам дека во рок од седум дена од моето официјално преземање на градоначалничката обврска почнувам со чекори за операционализирање и конкретизирање на активностите кои ќе значат работа
![Коњановски: Имаме акциски планови за седум клучни подрачја во Битола](https://mia.mk/index.php/images/20221108212037_big_730x400_11.webp )
Битола, 28 октомври 2021 (МИА) - Гарантирам дека во рок од седум дена од моето официјално преземање на градоначалничката обврска почнувам со чекори за операционализирање и конкретизирање на активностите кои ќе значат работа и функционирање на Општина Битола, изјави кандидатот за градоначалник на Битола од ВМРО ДПМНЕ, Тони Коњановски.
Во изборната програма, како што рече, имаме прецизни акциски планови за седум клучни подрачја.
-Подобри услови за живот за сите луѓе кои живеат во општина Битола со најмалку две нови инвестици и нови работни места за младите, ефикасна дигитализирана општина, урбана инфраструктура веднаш, зелена и чиста Битола, образование за 21 век, социјална заштита според индивидуалните потреби на секој поединец, разновидна и уникатна културна понуда, Битола не смее да губи ни ден во борбата за здрава животна средина, Битола топ туристичка дестинација и седмо, Битола град на спортот, на спортистите и спортската публика, наброи Коњановски.
Во изјава за медиумите, Коњановски потврди дека во првите 70 дена гарантира резултати од преземените активности и плановите за остварување на 241 проект, кои, како што рече, се неопходно потребни за Битола.
-Заради најмалку седум причини, на 31 октомври остануваме на заедничката страна и победуваме заедно за Битола, за секој од нас, за нашите деца, нашите внуци. Подготвен сум да ги реализирам овие 241 проект, знам како да направам оперативен план и стручни тимови, тоа да биде ефикасно и ефективно реализирано. Општината е јавен сервис и ќе работи исклучиво во партнерство со сите граѓани. Свесен сум дека треба некои работи од темел да ги покренеме и силно да притискаме за нивна реализација, како гасификацијата и топлификацијата. Тврдам дека целиот интелектуален, стручен и граѓански потенцијал ќе го мобилизирам во интерес на градот, затоа што како досегашен советник точно знам како функционира локалната самоуправа и како може да се подобри тоа, посочи Коњановски. мт/мд/