Отава, 18 март 2025 (МИА) – Премиерот на Канада, Марк Карни, на неговото прво патување во странство, вчера ги посети Лондон и Париз, изјави дека е важно да се зајакнат врските со „доверливите сојузници“ во Европа.

Одлуката на Карни да ги посети Париз и Лондон наместо Вашингтон, како што е вообичаено за канадските лидери, уследи откако американскиот претседател Доналд Трамп ги ескалира трговските тензии и со Канада и со Европа и се заканува со анексија на Канада.

- Поважно од кога било за Канада е да ги зајакне своите врски со доверливи сојузници како Франција, истакна Карни пред работниот ручек со претседателот Емануел Макрон во Елисејската палата, додавајќи оти Канада е „најевропската од неевропските држави“.

Додека Макрон алудирајќи на Трамп посочи дека „Канада е добар пример за земја, која ги штити националните интереси додека соработува на светската сцена.

- Мислам дека и двајцата веруваме дека правичната трговија, која ги почитува меѓународните правила, е добра за сечиј просперитет и секако е поефикасна од царините, истакна Макрон.

Карни по средбата со Макрон отпатува во Лондон каде се сретна со британскиот премиер Кир Стармер и кралот Чарлс Трети.

- Американскиот претседател Доналд Трамп мора да престане да дава непочитувачки коментари за Канада, пред двете земји да започнат сериозни разговори за идните врски, наведе Карни.

Тој потенцира дека Канада е подготвена за посеопфатна дискусија и преговарање за севкупните трговски и безбедносни односи помеѓу двете земји. ми/

фото: ЕПА