Во Прилепскиот театар премиера на „Бура“ од Шекспир и прва соработка со американски режисер
- Прилепскиот театар „Војдан Чернодрински“ вечер, од 20 часот, на матичната сцена ќе ја изведе претставата „Бура“ од Вилијам Шекспир, во режија на Џон Блондел. Ова е прва соработка на театарот со американскиот режисер Блондел од Калифорнија.
![Во Прилепскиот театар премиера на „Бура“ од Шекспир и прва соработка со американски режисер](https://mia.mk/index.php/images/20240605135429_big_730x400_81.webp )
Прилеп, 5 јуни 2024 (МИА) - Прилепскиот театар „Војдан Чернодрински“ вечер, од 20 часот, на матичната сцена ќе ја изведе претставата „Бура“ од Вилијам Шекспир, во режија на Џон Блондел. Ова е прва соработка на театарот со американскиот режисер Блондел од Калифорнија.
Режисерот Блондел шест недели е присутен и работеше со ансамблот на шекспировиот текст кој се смета за последно дело на славниот драмски автор, а кое ја содржи целата богата сложеност на животот.
-Ако имаме среќа да преживееме доволно долго, преживуваме бури: се вљубуваме, изневеруваме или сме изневерени, вршиме или трпиме насилство, вербано, физичко, емоционално, претрпуваме загуба, се прашуваме што нѐ чека. Бурата го содржи сето ова и уште повеќе. За Шекспир, преку волшебникот Просперо, тајната на животот е да се запамети, а потоа да се прости. Соработката со екипата е прекрасна. Јас работам на свој начин: знам што мислам, сакам да слушнам што мислат актерите за процесот на создавањето на претставата, изјави на прес-конференција режисерот Џон Блондел.
За драматургот Лидија Митоска Ѓорѓиевска соработката со режисерот била како ниедна досега.
-Ова беше првпат на поинаков начин да работиме со режисерот. Се чувствуваш како целосно дел од екипата. Невообичаен, делотворен пристап, рече Митоска Ѓорѓиевска.
Во претставата играат: Игор Трпчески, Ангела Наумоска, Даниела Иваноска, Наташа Ачански, Димитар Ѓорѓиевски, Александар Тодески, Михајло Миленкоски, Катерина Чакмакоска Клинческа, Ана Митоска.
Сценографијата, костимите, светлото и плакатот се на Благој Мицевски, музиката на Томе Темелкоски, а драматург е Лидија Митоска-Ѓорѓиевска. ем/мд/
Фото: МИА