ВМРО-ДПМНЕ слави двојна победа
- Приврзаниците на ВМРО-ДПМНЕ првично ја прославуваа победата пред седиштето на партијата, палатата „Христо Татарчев“, а во моментов се упатуваат кон плоштадот „Македонија”, каде има поставено бина, на која дел од македонските изведувачи пеат традиционални македонски песни.
![ВМРО-ДПМНЕ слави двојна победа](https://mia.mk/index.php/images/20240509002941_big_730x400_1.webp )
Скопје, 8 мај 2024 (МИА) — По првичните резултати од вториот круг на претседателските и парламентарните избори, членови и симпатизери на ВМРО-ДПМНЕ се собраа на плоштадот „Македонија” во Скопје да ја прослават победата на нивниот претседателски кандидат - Гордана Сиљановска — Давкова, но и победничките резултати од парламентарните избори.
Приврзаниците на ВМРО-ДПМНЕ првично ја прославуваа победата пред седиштето на партијата, палатата „Христо Татарчев“, по што продолжија со славење на плоштадот „Македонија” каде се обрати лидерот на партијата Христијан Мицкоски.
– Ја ослободивме Македонија. Сите тие што мислеа дека можат Македонија да ја уништат и понижат денеска завршија на буниште и набрзо ќе одговараат. Овој народ денеска се собра овде спонтано затоа што си ја љуби, сака и штити својата Македонија. Сакам да ви се заблагодарам на сите вие што сте овде, но и на сите ширум Македонија, што бевте нашиот мотив целиот овој период. Одбравме да биде тешко, а да не биде срамно. Го заштитивме вашиот образ, не беше срамно, беше тешко, но успеавме - победивме радувајте се, рече Мицкоски.
Кандидатката за претседател на ВМРО-ДПМНЕ, Гордана Силјановска — Давкова, според објавените резултати на Државната изборна комисија по преброени 95 отсто од гласачките ливчиња, Сиљановска Давкова освоила 524.658 гласови (65,04%), а нејзиниот противкандидат Сево Пендаровски од СДСМ 236.222 гласови (29.29%).
Според првичните резултати од денешните парламентарни избори што Државната изборна комисија ги објавува на својата веб-страница, покажуваат дека од обработени над 90 проценти од гласовите, Коалицијата „Твоја Македонија“ на ВМРО-ДПМНЕ има освоено 390.345 (43,09%) или 59 мандати во новиот 120 член собраниски состав. ра/аа/
Фото: МИА