Софија, 8 февруари 2025 – Бугарската лична карта го освои првото место за најдобра лична карта во Европа за 2024 година, на овогодишната изложба-конференција High Security Printing EMEA-2025, една од најпрестижните за дизајн и изработка на лични документи, пасоши и банкноти, соопшти МВР.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Од институцијата додаваат дека ова е исклучително признание за напорната работа на креативниот тим на вработени во МВР, заедно со Mühlbauer ID Services GmbH – C&T конзорциумот.

Покрај модерниот и естетски дизајн, бугарската лична карта беше почестена од жирито и за најсовремената заштита вградена во неа, како и за електронскиот носач на информации во кој дигитално се евидентираат биометриските податоци и електронскиот идентитет.

Вградените заштити значително ја зголемуваат безбедноста на новата лична карта и овозможуваат таа да се користи како електронски документ за патување и минување низ електронските порти на граничните пунктови.

Годишната изложба за печатење со висока безбедност High Security Printing EMEA-2025 се одржа во Базел, Швајцарија. На него беа претставени најсовремените решенија од водечки светски компании од областа на електронските пасоши, банкнотите, паметните картички и сродните индустрии, соопшти МВР.

Во име на Министерството за внатрешни работи, на конференцијата присуствуваа Стојан Стефанов, директор на Управата за бугарски лични документи и Станислава Стојнова, главен експерт за развој на секторот за безбедни документи.

БТА потсетува дека на 17 јуни 2024 година Дирекцијата „Бугарски лични документи“ воведе нов модел на бугарска лична карта. Со цел да се зголеми безбедноста на документот, покрај сликата, ќе содржи и електронски носач на информации со снимени биометриски податоци – два отпечатоци и фотографија.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.