Вашингтон, 21 април 2024 (МИА) - Американскиот претседател Џо Бајден истакна дека усвојувањето на законот за странска помош од Претставничкиот дом испраќа „јасна порака“ за американското лидерство во светот.

„Членовите на двете партии во Претставничкиот дом гласаа за унапредување на интересите на нашата национална безбедност и испраќање јасна порака за моќта на американското лидерство на светската сцена. Во оваа критична пресвртница, тие се собраа да одговорат на повикот на историјата, донесувајќи итно потребен закон за националната безбедност за која со месеци се борев да ја обезбедам“, рече Бајден.

Тој го повика Сенатот да ги усвои овие закони што е можно поскоро и да ги испрати кај него за да може да ги потпише и оружјето и опремата брзо да се испратат во Украина.

По неколкумесечни политички битки, Претставничкиот дом на Конгресот на САД усвои пакет од 95 милијарди долари, кој предвидува околу 60 милијарди долари помош за Украина, 26 милијарди за Израел и околу 10 милијарди за индо-пацифичкиот регион.

Усвоен е и закон кој доведе до чекор поблиску до забраната на Тик-Ток во САД, како и закон со кој се забранува финансирање на агенцијата на ОН која им помага на Палестинците и палестинските бегалци. рп/

Фото: ЕПА