Москва, 9 јануари 2026 (МИА) - Лоран Винатје, француски политиколог кој отслужува тригодишна затворска казна во Русија по обвинение за шпионажа, е ослободен во размена на затвореници со Франција, соопшти денеска руската безбедносна агенција ФСБ.

За возврат, рускиот кошаркар Данил Касаткин, кој беше притворен во Франција по барање на САД, е ослободен, додаде ФСБ.

Винатје беше уапсен во Москва во јуни 2024 година, а руските власти го обвинија дека не се регистрирал како „странски агент“ додека собирал информации за „воените и воено-техничките активности“ на Русија што би можеле да се искористат на штета на националната безбедност.

Судот го осуди и му изрече три години затвор.

Во август, руските медиуми објавија дека Винатје е обвинет и за шпионажа, повикувајќи се на судски записи.

Оние што се осудени за шпионажа во Русија се соочуваат со затворски казни од 10 до 20 години. мс/сд/

фото: ЕПА