Скопје, 9 јануари 2026 

Партијата на пензионерите како партија на политичкиот центар ја поддржува иницијативата на премиерот Христијан Мицкоски за постигнување широк политички консензус за клучните реформски закони за трасирање единствен пат кон Европската Унија и за укинување на техничката влада, стои во соопштението на партијата, кое МИА го објавува интегрално.

Исто така, неопходно е сите стратешки и витални прашања во врска со државата да се решат на еден консензуален и транспарентен начин, во вистинска визионерска смисла и во интерес на граѓаните, со нивно реално аплицирање на секојдневното живеење.

На владејачките партии како носители на законодавната и извршната власт им посочуваме конструктивно да ги согледаат предлозите и забелешките од страна на опозицијата, но во исто време на опозицијата ѝ предлагаме да се вклучи максимално во поднесувањето реални и издржани солуции, како и да ги поддржи сите добри решенија на Владата, кои се во интерес на граѓаните и државата.

Партијата на пензионерите уште еднаш потенцира и бара од сите релевантни политички фактори во земјата да се покаже и докаже највисокото рамниште на политичка, општествена, национална и државничка доблест, мудрост и вештина за постигнување во овој момент на најбитната државна цел, а тоа е полноправно и достоинствено членство во Европската Унија.

Партија на пензионерите

Чесно, сплотено и одлучно