Стокхолм, 24 ноември 2025 (МИА) – Од самиот почеток, Романија најостро ја осуди нелегалната окупација на Крим во 2014 година и тековната незаконска агресија, изјави Мирча Абрудеан, претседател на Сенатот на Романија на Четвртиот парламентарен самит на Кримската платформа, што се одржува во Стокхолм.

- Ние остануваме целосно посветени на поддршката на Украина сè додека е потребно, нагласи тој.

Абрудеан подвлече дека војната на Русија против Украина е флагрантно прекршување на меѓународното право, демократијата и човековите права, додавајќи дека во такви околности, ниту една земја не е целосно безбедна. Тој изјави дека светот мора да ја зајакне својата поддршка за борбата на Украина за одбрана и обновување на нејзиниот територијален интегритет, притоа нагласувајќи ги плановите на Романија за засилување на санкциите против Русија за да се постигне мир во Украина.

Претседателката на Конгресот на пратеници на Шпанија Франсина Арменгол ја нагласи неопходноста од интегрирање на Украина во Европската Унија и потврди дека Шпанија прави сè што е можно за да ги надмине преостанатите пречки на патот кон членството на Украина во ЕУ. Таа се фокусираше на најбруталните последици од агресијата, киднапирањето деца од украинските семејства, и нагласи дека Русија користи сè понапредни технологии во војувањето. Франсина Арменгол истакна дека Шпанија е подготвена да ѝ помогне на Украина во реконструкцијата и идниот развој на нејзините градови.

- Ништо не може да се одлучи за Украина без учество на Украина; ништо не може да се одлучи за Европа без учество на Европа. И очигледно, постојат црвени линии што се повлечени, и мора да се придржуваме до нив, рече таа.

Претседателот на Претставничкиот дом на Малта Анџело Фаруџа нагласи дека агресијата против Украина не е само загрозување на нејзиниот суверенитет, туку и напад врз основните принципи на меѓународниот поредок. Тој истакна дека меѓународната заедница е активно вклучена во следењето на ситуацијата во Украина, особено во врска со кршењето на човековите права на окупираниот полуостров.

- Кримскиот Полуостров е милитаризиран, дестабилизирајќи го целиот регион на Црното Море, а последиците се протегаат далеку надвор од Украина, рече тој. јт/

Фото: Кримска платформа