Киев, 7 декември 2025 (МИА) – Министрите за надворешни работи на Бугарија и Украина, Георг Георгиев и Андриј Сибиха остварија телефонски разговор во врска со натамошните чекори за развој на билатералната соработка меѓу двете земји, соопшти Укринформ, цитирајќи објава на украинскиот прв дипломат на социјалните мрежи.

Сибиха синоќа на Х напиша дека за време на разговорот со бугарскиот министер за надворешни работи го информирал „за последиците од масовните руски напади врз цивилната и енергетската инфраструктура на Украина“.

Двајцата разговарале за најновите случувања околу напорите за постигнување мир во Украина, како и за „натамошните чекори за напредок во билатералната соработка“.

- Благодарен сум за поддршката на Бугарија за нашето пристапување во ЕУ и за нејзиниот придонес кон нашата отпорност, особено за транзитот на гас кон Украина, додаде Сибиха.

Георг Георгиев во средата учествуваше на состанокот на министрите за надворешни работи на НАТО во Брисел, каде што нагласи дека Бугарија останува посветена на поддршката за Украина, бидејќи тоа е поддршка за меѓународниот правен поредок и за принципот дека силата не може да надвладее над правото. јт/