Tuzlla, 7 nëntor 2025 (MIA) - Numri i viktimave të zjarrit katastrofik në Shtëpinë e të moshuarve në Tuzlla është rritur në 13, pasi mbrëmë në orën 23:01 në Qendrën Klinike Universitare (QKU) Tuzlla  vdiq edhe një paciente e cila mori lëndime të rënda nga stuhia e zjarrit, raportuan mediat lokale.

Pacientja e ndjerë ishte e hospitalizuar në Klinikën për Anesteziologji dhe Reanimacion, ku për shkak të gjendjes së rëndë shëndetësore ishte me mbështetje të respiratorit. Fatkeqësisht, pavarësisht përpjekjeve të mjekëve, ajo ndërroi jetë nga plagët e marra.

Pas zjarrit, në QKU Tuzlla 30 persona u hospitalizuan, ndërsa për momentin në trajtim janë 13 pacientë.

Nga QKU Tuzlla njoftuan se në Klinikën për Anesteziologji dhe Reanimacion "aktualisht janë tre pacientë, njëri prej të cilëve është në mbështetje të respiratorit. Gjashtë pacientë janë shtruar në spital në Klinikën për Sëmundje Pulmonare (një polic dhe pesë banorë të Shtëpisë). Në Klinikën për Sëmundje Interne janë hospitalizuar tre pacientë  me gjendje shëndetësore të qëndrueshme. Në Klinikën për Urologji është hospitalizuar një pacient, gjithashtu me gjendje shëndetësore të qëndrueshme".

Hetimi zbuloi lëshime të shumta

Një autopsi e kryer mbi 11 nga viktimat përcaktoi se të gjithë vdiqën si pasojë e mbytjes dhe trupi i një personi u përfshi gjithashtu nga zjarri.

Tragjedia ka ngritur pyetje të shumta në lidhje me kushtet e punës në Shtëpi, dhe publiku është veçanërisht i interesuar pse personat e palëvizshëm ishin vendosur në katet më të larta, nga ku evakuimi ishte jashtëzakonisht i vështirë.

Gjithashtu u zbulua se për 185 shfrytëzues kujdeseshin një personel mjekësor prej tre personave.

Nën dyshim u gjetën edhe puna financiare dhe menaxhimi i tërësishëm me institucionin.

Arsyeja e zjarrit ende nuk dihet, por në ndërkohë, drejtori i Shtëpisë dha dorëheqje. sa/

foto: EPA