Shkup, 19 nëntor 2025 (MIA) - Me shtatë muaj burg është dënuar personi i cili para tre viteve  ka përplasur me makinë Arbërin, bashkëshortin e Kaltrina Zekolli Shaqiri, e cila në një konferencë për shtyp i bëri thirrje Prokurorisë ta apelojë vendimin e Gjykatës Themelore.

"Sot qëndroj para jush me duar të lidhura. Ligji nuk më jep të drejtën e ankesës. Por, prokuroria ka, dhe sot po i drejtohem publikisht: Kërkoj apelim të vendimit. Kërkoj një dënim të drejtë. Kërkoj që jeta e një njeriu të mos vlerësohet me një vendim që i ngjan një vepre të lehtë penale. Nuk po kërkoj hakmarrje. Nuk po kërkoj ndëshkim emocional. Kërkoj drejtësi për familjen time, por edhe për çdo qytetar. Sepse sot jam unë, nesër mund të jetë dikush tjetër. Kur drejtësia dështon në një rast, rrezikon të dështojë në të gjitha", tha Zekolli Shaqiri. 

 Më 17 nëntor, tre vjet më parë, bashkëshorti i Zekolli Shaqirit humbi jetën në një aksident rrugor kur një automjet në rrugë i mori jetën. Që atëherë, jeta e saj, e fëmijëve dhe e familjes së saj ka ndryshuar plotësisht dhe ata jetojnë me dhimbjen e përditshme të humbjes, ndërsa personi që shkaktoi tragjedinë ishte në liri. 

"Tre vjet kemi pritur drejtësi. Kemi pritur një gjykim të drejtë dhe një vendim që pasqyron peshën e një jete të humbur. Por vendimi që u dha së fundmi ishte vërtet tronditës. Vetëm shtatë muaj burg, me të drejtë ankese. Dua të jem e qartë: Vepra penale për të cilën akuzohet i dyshuari është neni 300, paragrafi 4 i Kodit Penal, i cili parashikon një dënim nga 1 deri në 5 vjet burg. Dënimi i shqiptuar nga Gjykata Themelore është në kundërshtim të plotë me peshën e veprës, me pasojat tragjike të veprimeve të tij dhe me praktikën gjyqësore për raste të tilla", tha Zekolli Shaqiri. 

Edhe pse kanë kaluar tre vjet nga aksidenti, procesi gjyqësor filloi në maj, ndërsa disa ditë më parë pati një vendim, tha ajo, duke shtuar se përfaqësuesi i tyre ligjor paraqiti një kërkesë në prokurori vendimi të ankimohet.

Si pasojë e aksidentit, tha ajo, një i ri humbi jetën, duke lënë pas një familje dhe dy fëmijë të mitur, ndërsa një person tjetër mori lëndime trupore. Sipas Zekolli Shaqirit, pra, vetëm shtatë muaj burg për një vepër me pasoja kaq të rënda nuk është një dënim, por përkundrazi një padrejtësi edhe më e madhe se e para, dhe këtë herë padrejtësia vjen nga vetë gjykata. Në sallën e gjyqit, ajo tha se nuk ndihej e mbrojtur ose e dëgjuar, dhe se gjykatësja Dragana Isakovska i është drejtuar me një "ton të lartë" megjithëse, siç thotë, ka reaguar natyrshëm si një grua që ka humbur gjithçka. 

 Kaltrina Zekolli Shaqiri, e cila për momentin e kryen funksionin zëvendësministre e Transportit, thotë se e kupton dhe është e vetëdijshme se thirrja në prokurori dhe reagimi i saj mund të priten me interpretime, shtrembërime dhe dyshime, por theksoi se është më e lehtë për të të përballet me barrën e reagimeve të tilla sesa të heshtë përballë padrejtësisë ndaj bashkëshortit dhe fëmijëve të tyre.

 "Dhimbja nuk ndahet me askënd. Ne e mbajmë brenda vetes, mësojmë të jetojmë me të dhe ta shndërrojmë në forcë. Por sot jam këtu e sinqertë, e thyer dhe me shpresën e vetme që ky apel publik të mos bjerë në vesh të shurdhër", tha Zekolli Shaqiri, duke theksuar se po kërkon drejtësi për Arbërin, se po kërkon përgjegjësi dhe një vendim që vlerëson vlerën njerëzore të një jete që iu mor padrejtësisht.

Foto: MIA