Shkup, 24 janar 2025 (MIA) - Kryeministri Hristijan Mickoski thotë se vizita në SHBA ishte historike dhe në interes të qytetarëve, ndërsa për akuzat e opozitës thotë se po defokusohen nga esenca.

"Kjo është politika e zgjedhur nga opozita dhe njerëzit pranë opozitës. Unë isha Micko i izoluar, pastaj VMRO-DPMNE e izoluar... pse nuk e dëgjova veten në këtë rol si kryetar i VMRO-DPMNE-së për shtatë vjet dhe si kryeministër për shtatë apo tetë muaj nga të njëjtët njerëz, e njëjta qendër komunikimi... E rëndësishme është se vizita është bërë vetëm në interes të qytetarëve dhe shtetit. Dhe për këtë vizitë mund të interesohen vetëm qytetarët dhe Maqedonia, askush tjetër", theksoi Mickoski.

Sipas tij, është thjesht një përpjekje e opozitës për t'u defokusuar në një temë periferike.

"I kuptoj, është një përpjekje për t'u defokusuar në një temë periferike. Unë as nuk kam fjetur në këtë apo atë hotel, as nuk kam bërë këtë apo atë gjë që dëgjoni në publik. Asnjë nga këto nuk është e vërtetë. Në Uashington kam fjetur në një hotel me tre yje... Dhe hoteli që po tregonin ishte hoteli ku njeriu që është në listën e Forbs me 1.2 miliardë dollarë pasuri, Kris Pavlovski, organizoi një takim ku diskutuam mundësitë si të bëjmë më mirë në mënyrën më të lirë dhe më të mirë dixhitalizimin e Maqedonisë. Ata po bëjnë përpjekje për të defokusuar nga thelbi, ne jemi të fokusuar te esenca. Të gjitha ato takime do të sjellin vlerë të shtuar për qytetarët dhe për Maqedoninë. Një vizitë historike në nivelin më të lartë që ka bërë ndonjëherë dhe mendoj se niveli shumë shpejt do të jetë në nivelin më të lartë të një takimi të tillë atje, por të presim dhe do të flasim për këtë për disa muaj nga sot", tha Mickoski pas inspektimit të rindërtimit të rrugës Katllanovë - Gradmanci.

Kryeministri ritheksoi se është shumë i kënaqur me vizitën në Uashington dhe Nju-Jork.

"Vizita ishte jashtëzakonisht e dobishme, frytdhënëse dhe pres që rezultatet të jenë të dukshme, intensive dhe të mëdha në periudhën që do të vijojë. Ne do të bëjmë detyrat tona dhe do të luftojmë për projekte si ky, për infrastrukturë të mirë, për kopshte të reja, për shkolla të reja, për një ekonomi më konkurruese, për shëndetësi më të mirë, për arsim më të mirë etj. Këto janë gjëra që do t'i zgjidhim në vend dhe do ta luftojmë atë betejë dhe do ta fitojmë. Por duhet të fitojmë edhe në Uashington, Nju-Jork, Bruksel, Romë, Paris, Londër, Berlin, kudo dhe në metropolet e tjera anembanë botës. Dhe le të jemi sa më të zëshëm dhe të paraqesim sa më shumë argumente para bashkëbiseduesve tanë, për çështjen maqedonase, për të gjitha sfidat që na presin, por edhe ato që ishin pas nesh. Dhe mendoj se jemi në rrugën e duhur. Nuk do të ketë rezultate të menjëhershme, por është e rëndësishme që atë që bëjmë, ta bëjmë ekskluzivisht për interesin e qytetarëve dhe të atdheut që kemi", tha Mickoski.

Mickoski vlerësoi se pas vizitës në SHBA, është i sigurt se Maqedonia si shtet ka hyrë në perspektivën e njerëzve që kanë zërin më të lartë në rrethin e presidentit Tramp. "Jam i bindur se Maqedonia pas këtij takimi është pjesë e optikës së administratës së re të presidentit Tramp, si në plan politik ashtu edhe në gjeostrategjik, por edhe ekonomik", tha Mickoski. sa/

Foto: Qeveria