Nju Jork, 24 dhjetor 2025 (MIA) - SHBA njoftoi mbrëmë në Kombet e Bashkuara se do të vendosin dhe zbatojnë sanksionet maksimale të mundshme për ta privuar presidentin e Venezuelës, Nikolas Maduro, dhe kartelit të tij të drogës nga burimet.

Mediat britanike raportojnë se administrata e presidentit të SHBA-së, Donald Tramp, ka kryer një fushatë sulmesh vdekjeprurëse për muaj të tërë ndaj anijeve pranë brigjeve të Venezuelës dhe brigjeve të Paqësorit të Amerikës Latine, të dyshuara për përfshirje në trafikun e drogës. Tramp ka kërcënuar gjithashtu me sulme në tokën e Venezuelës.

"Kërcënimi më serioz për këtë hemisferë, për fqinjësinë tonë dhe për SHBA-në vjen nga grupet terroriste dhe kriminale transnacionale", tha ambasadori i SHBA-së në KB, Majk Valc, në mbledhjen e Këshillit të Sigurimit të KB-së.

SHBA ka rritur praninë e tyre ushtarake në rajon dhe Tramp ka njoftuar bllokimin e të gjitha anijeve që i nënshtrohen sanksioneve të SHBA-së. Deri më tani këtë muaj, roja bregdetare e SHBA-së ka kapur dy cisterna që transportonin naftë bruto nga Venezuela në Detin e Karaibeve, kujtojnë mediat britanike.

"Realiteti është se cisternat e naftës të sanksionuara veprojnë si një litar shpëtimi i madh ekonomik për Maduron dhe regjimin e tij të paligjshëm. Cisternat e sanksionuara gjithashtu financojnë grupin narko-terrorist Kartel de Los Soles, pretendon Valc.

Në fund të muajit të kaluar, Uashingtoni e caktoi Kartel de los Soles, ose Kartelin e Diellit, si një organizatë terroriste të huaj për rolin e saj të dyshuar në importimin e drogës në SHBA. Në të njëjtën kohë, ai akuzoi Maduron se drejton kartelin. Qeveria venezueliane i ka quajtur pretendimet e tilla "qesharake" dhe grupin "joekzistent".

Valc foli në seancën e Këshillit të Sigurimit të KB-së pas Nebenzias, por nuk iu përgjigj drejtpërdrejt vërejtjeve të tij.

"Kina i kërkon SHBA-së të ndalojnë menjëherë veprimet përkatëse dhe të shmangin përshkallëzimin e mëtejshëm të tensioneve", tha zëvendësambasadori i Kinës në KB, Sun Lei.

Venezuela me mbështetjen e Rusisë dhe Kinës, kërkoi konvokimin e seancës së Këshillit të mbajtur mbrëmë, si dhe të tjerë në lidhje me përshkallëzimin e tensioneve. sa/

foto: EPA