Helsinki, 3 nëntor 2025 (MIA) - Presidenti finlandez Aleksandar Stub sot deklaroi se ka filluar një "epokë e re e armëve bërthamore" pas disa deklaratave të presidentit amerikan Donald Tramp, i cili njoftoi qëllimin e tij për të vazhduar me testimet bërthamore.

"Logjika e parandalimit dhe stabilitetit strategjik midis superfuqive po kalon një transformim të thellë. Ne kemi hyrë në një epokë të re për sa i përket armëve bërthamore, në të cilën, për fat të keq, rëndësia e këtyre armëve vazhdon të rritet", tha Stub në fjalimin në Helsinki.

Javën e kaluar, presidenti amerikan Donald Tramp shkaktoi shqetësim në të gjithë botën kur tha se kishte ndërmend të vazhdojë me testimet e armëve bërthamore, pa specifikuar saktësisht se çfarë mendonte.

Mbetet dyshimi lidhur me deklaratën e tij - pavarësisht nëse i referohet testimit të armëve të afta për të mbajtur koka luftarake bërthamore, apo vetë detonacionit të një koke luftarake bërthamore, të cilën SHBA-ja nuk e kanë kryer që nga viti 1992.

Vendimi është miratuar në një kohë kur retorika bërthamore shfaqet periodikisht që nga fillimi i pushtimit rus të Ukrainës në shkurt të vitit 2022.

Në ditët e fundit, Rusia ka kryer teste të armëve bërthamore, duke përfshirë dronin nënujor "Poseidon" dhe raketën ruse "Burevestnik".

Asnjë fuqi nuk ka kryer zyrtarisht një test bërthamor në tre dekadat e fundit - me përjashtim të Koresë së Veriut, e cila kreu gjashtë teste midis viteve 2006 dhe 2017.

Rusia, atëherë Bashkimi Sovjetik, nuk ka kryer asnjë provë që nga viti 1990, dhe Kina që nga viti 1996.

Por shumë vende, midis të cilave SHBA më së shpeshi, kryejnë rregullisht teste të sistemeve të lëshimit të raketave bërthamore: raketa, nëndetëse dhe avionë luftarakë. ls/

Foto: Arkivi i MIA-s