Bogota, 23 dhjetor 2025 (MIA) - Presidenti kolumbian Gustavo Petro shpalli 30 ditë gjendje të jashtëzakonshme ekonomike dhe sociale për t'i lejuar qeverisë të vendosë taksa të reja pasi Kongresi hodhi poshtë reformën e tij tatimore për të financuar buxhetin e vitit 2026. 

Petro, kryetari i parë i majtë në historinë e Kolumbisë, pretendon se vendi po përballet me një "krizë të afërt fiskale" që mund të ndikojë në mirëqenien e popullsisë, publikoi "Figaro". 

Qeveria planifikon të mbledhë katër miliardë dollarë shtesë për të mbyllur deficitin buxhetor, për të cilin pritet të kalojë shtatë për qind këtë vit. 

Ekonomia e Kolumbisë është ende në rritje, me një rritje të parashikuar prej 2,6 deri në 2,7 për qind të PBB-së deri në fund të vitit, por shpenzimet dhe borxhi publik po rriten më shpejt se të ardhurat. 

Petro paralajmëroi se pa gjendje të jashtëzakonshme, mund të pasojnë shkurtime drastike në financat e shtetit. 

"Qeveria nuk do të lejojë që të shpërthejë një krizë. Nëse nuk shpallet gjendje e jashtëzakonshme (ekonomike), do të ketë shkurtime", paralajmëroi ai për Iks. 

Gjatë mandatit të tij në detyrë nga viti 2022, Petro ka nisur reforma në sistemet e taksave, shëndetësisë dhe të punës, por deri më tani janë zbatuar vetëm reformat e punës dhe të pensioneve, publikoi "Figaro". rq/

Foto: arkivi i MIA-s