15:00/ 30 mars/ 2025

Shkup - Presidentja Gordana Siljanovska-Davkova, me rastin e festës së madhe myslimane të Fitër Bajramit, sot në mëngjes ka dërguar një mesazh urimi për qytetarët e besimit islam dhe për kreun e Bashkësisë Fetare Islame, Reis-ul-Ulema h. hfz. Shaqir ef. Fetahu. "Me gjithë zemër, ju uroj që ditët e festave t'i kaloni në harmoni dhe mirëqenie, të mbushura me gëzim dhe lumturi, duke ndarë dashurinë dhe vëmendjen me të dashurit tuaj. Këtë vit, në muajin e shenjtë të Ramazanit, muajin e agjërimit, lutjes dhe faljes, na goditi një tragjedi e paparë që na tronditi si komunitet dhe si individë. Mendimet tona janë me familjet e viktimave dhe të lënduarve. Pavarësisht përkatësisë fetare, etnike apo çfarëdo tjetër, të gjithë solidarizohemi së bashku", thekson Siljanovska-Davkova në urimin e saj.

Shkup - Kryeministri Hristijan Mickoski ka dërguar urim me rastin e festës së Fitër Bajramit për të gjithë qytetarët e besimit islam, duke u dëshiruar shëndet, gëzim, lumturi, paqe dhe qetësi në familjet e tyre. "Fitër Bajrami është festë e solidaritetit dhe humanitetit, e cila i mëson të pasurit të përmbahen nga komoditetet personale dhe të mos i harrojnë të varfrit dhe jetimët. Kjo festë nënkupton se përmes veprave të mira, respektit të ndërsjellë, durimit dhe mirëkuptimit të ndërsjellë mund ta mposhtim të keqen. Së bashku, përmes bashkëpunimit, bashkëjetesës, tolerancës, vlerave dhe parimeve të vërteta do të vazhdojmë ta ndërtojmë Maqedoninë si shtet të përbashkët dhe më të avancuar", shkruan Mickoski në urim.

 Novosellë - Kryeministri Hristijan Mickoski konsideron se propozimi i kryetarit të LSDM-së, Venko Filipçe për takim të liderëve është temë shumë serioze për t'u diskutuar përmes mediave. "Takimi i liderëve është një temë shumë serioze për t'u biseduar përmes mediave. Nga ajo sa kuptova në publik është se Filipçe ka një lloj propozim, një plan. Ai mund ta bëjë të ditur atë plan përmes një konference për shtyp, por nëse vlerëson se duhet të më informojë dhe të më prezantojë paraprakisht, unë jam gjithmonë këtu. Temat serioze kërkojnë qasje serioze", tha Mickoski, duke u përgjigjur në pyetjen e gazetarëve në Novosellë të Strumicës, ku ishte duke inspektuar aktivitetet ndërtimore të projektit për ndërtimin e shtegut për ecje dhe rekreacion nga Novosella në Mokrievë. 

Novo Sellë - Kryeministri Hristijan Mickoski, së bashku me ministrin e vetëqeverisjes lokale, Zllatko Perinski dhe kryetarët e komunave nga VMRO-DPMNE nga rajoni i Strumicës, sot kanë inspektuar ndërtimin e shtegut për ecje dhe rekreacion nga Novo Sella në Mokrievë me mjete nga thirrja e parë e kredisë hungareze. Mickoski në një deklaratë për media ka apeluar tek kryetari i Komunës së Strumicës, Kostadin Kostadinov që të aplikojë me projekte nga thirrja e dytë."Nuk është kohë për politikë të ulët, është kohë të punohet për qytetarët. Kaloi koha kur Maqedonia vidhej, poshtërohej, nënvlerësohej, turpërohej – tani është koha të ndërtohet, pavarësisht që ai ndoshta, për shkaqe parazgjedhore brendapartiake, përpiqet të kritikojë Qeverinë. Në rregull, është e drejta e tij dhe ai mund ta bëjë këtë, por e lus personalisht dhe në emër të Qeverisë të dorëzojë projekte. Natyrisht, që të mos jetë si në thirrjen e parë, të dorëzojë projekte sipas kritereve që të mund t’i financojmë edhe ato projekte për Komunën e Strumicës. Ne do të vazhdojmë t'i financojmë projektet, siç dëgjuat edhe në Novo Sellë, edhe në Bosillevë, edhe në Vasilevë – kështu që nuk ka pjesë të harruara, siç tha edhe ministri i vetëqeverisjes lokale", tha kryetari i Qeverisë.

Shkup - Kryetari i Kuvendit të Republikës së Maqedonisë së Veriut, Afrim Gashi, me rastin e festës së madhe - Fitër Bajramit, sot në mëngjes ka dërguar një mesazh urimi për qytetarët e besimit islam, duke uruar që kjo ditë të jetë burim gëzimi dhe paqeje, me më shumë dashuri, mirëkuptim dhe solidaritet në familje. "Pas një periudhe reflektimi, sacrifice dhe angazhimi të thellë për t’u afruar më shumë me Zotin, kam kënaqësinë t’ju uroj festën e madhe të Fitër Bajramit! Ramazani na mësoi se agjërimi është një rrugë për ta pastruar shpirtin, dhe se çdo ditë është mundësi për të praktikuar vlerat e sinqeritetit, dashurisë dhe respektit për njëri-tjetrin. Prandaj, duke lënë pas muajin e Ramazanit, le të dalim me zemër të pastër dhe më shumë gatishmëri për të ndihmuar ata që kanë nevojë, si dhe për të kontribuar në forcimin e unitetit, tolerancës dhe harmonisë shoqërore", shkruan Gashi në urim.

Shkup - Kryetari i Lidhjes Socialdemokrate të Maqedonisë, Venko Filipçe, u ka dërguar urim qytetarëve të besimit islam me rastin e festës së madhe fetare të Fitër Bajramit. Në urimin e tij, kryetari i LSDM-së thekson se kjo festë e shenjtë na kujton vlerat themelore të respektit të ndërsjellë, solidaritetit dhe humanizmit, të cilat janë themeli mbi të cilin bashkërisht duhet të ndërtojmë të ardhmen tonë.

Shkup - Ministri i Administratës Publike Goran Minçev ka dërguar një mesazh urimi për qytetarët e besimit islam me rastin e festës së madhe fetare të Fitër Bajramit. "Fitër Bajrami është një festë që na kujton rëndësinë e solidaritetit, tolerancës dhe bashkimit – vlera që janë themeli i një shoqërie të drejtë dhe gjithëpërfshirëse. Këto parime duhet të jenë edhe parim udhëzues në institucione, sepse një administratë publike e fortë nënkupton shërbime cilësore për të gjithë qytetarët, pa dallim të përkatësisë së tyre fetare apo etnike", thotë Minçev në urim.

 Shkup - Zëvendëskryetari i Qeverisë së Republikës së Maqedonisë dhe ministër për Marrëdhënie Ndërmjet Bashkësive, Ivan Stoilkoviq, me rastin  e Fitër Bajramit u dërgoi urim qytetarëve të besimit myslimanë. "Kjo festë i ndriçoi shtëpitë dhe zemrat tuaja me dashuri, harmoni dhe tolerancë, sepse jam i sigurt se këto vlera janë një rrugë e sigurt për një të ardhme më të mirë dhe më të lumtur për vendin tonë dhe të gjithë qytetarët e tij", shkruan në urim Stoilkoviq.

Shkup - Kryetarja e qytetit të Shkupit, Danella Arsovska, qytetarëve të besimit islam u ka dërguar urim për Fitër Bajramin, duke u dëshiruar shëndet, dashuri, lumturi dhe mirëqenie. "Me vepra të mira dhe bashkim, le të vazhdojmë të nxisim solidaritetin, mirëkuptimin e ndërsjellë, tolerancën dhe bashkëjetesën. Të bashkuar, le të kontribuojmë për prosperitetin dhe mirëqenien për të gjithë. Ju uroj ditë të gëzuara festash të mbushura me gëzim, paqe dhe harmoni", ka shkruar Arsovska në urim. 

Shkup - Kryetari i Komunës së Qendrës, Goran Gerasimovski, uron të gjithë qytetarët e besimit islam me rastin e festës së madhe të sotme, Fitër Bajramit. "Me rastin e festës së madhe të gjithë besimtarëve islam, ju uroj përzemërsisht festën e Fitër Bajramit. Në emrin tim dhe në emër të komunës, të gjithë besimtarëve të besimit islam, urime Fitër Bajramin. Fryma e besimit, e durimit dhe e solidaritetit qoftë udhërrëfyesi ynë në ditët në vijim. Ky Fitër Bajram le t'ju sjell shëndet, paqe, gëzim, shtëpitë dhe zemrat tuaja të mbushen me ngrohtësi dhe dashuri", thotë kryetari i komunës Gerasimovski.

Shkup - Kryeministri Hristijan Mickoski dhe ministri i Vetëqeverisjes Lokale Zllatko Perinski sot në kuadër të fushatës "Aty ku zemra është në shtëpi", do të marrin pjesë në inspektimin e aktiviteteve ndërtimore të projektit për ndërtimin e shtegut për shëtitje dhe rekreacion nga Novo Sella deri në Mokrievë në Komunën e Novo Sellës. Siç njoftoi Ministria e Vetëqeverisjes Lokale, Perinski do të mbajë takim pune me kryetarin e komunës Gjorgje Bozhinov dhe anëtarët e Këshillit të Komunës.

Dibër - Kryetarët e komunave të Dibrës, Mavrovës dhe Rostushes dhe Qendër Zhupës dhe Lidhja e Maqedonasve me Religjonin Islam, (LMRI), dërguan urime për të gjithë besimtarët në rajon dhe mërgimtarët me rastin e festës së madhe të Fitër Bajramit. Namazi i mëngjesit dhe i Bajramit u fal në të gjitha xhamitë e Myftinisë Dibër, e cila mbulon të tri komunat. Në Dibër, besimtarët më të shumtë kanë marrë pjesë në xhaminë qendrore "Haxhi Vehbi Dibra", e bashkë me ta në faljen e mëngjesit dhe të Bajramit ishte edhe kryetari i komunës Hekuran Duka, i cili në urimin e tij uroi paqe, shëndet dhe begati.

 Shkup - Nevojitet përparim i mëtutjeshëm i arsimimit financiar tek të rinjtë përmes aktiviteteve mësimore dhe jashtëshkollore, me qëllim që ata të kenë jetë cilësore, të planifikojnë buxhetin dhe financat e tyre dhe  me mençuri t'i përdorin mjetet të cilat i kanë në dispozicion, konsiderojnë pjesëmarrëset e Forumit të tretë Ekonomik të Grave që sot mbahet në Shkup.

Shkup - Ministrja e Arsimit dhe Shkencës, Vesna Janevska, deklaroi sot se në muajin prill do të ketë rritje të pagave prej shtatë për qind në arsim dhe se kjo, përveç kuadrit mësimor, do të vlejë edhe për të gjithë të punësuarit në shkollat ​​fillore dhe të mesme. "Për fat të keq, në rrjetet sociale kanë dalë spekulime të shumta se diçka nuk shkon me rritjen e pagave. Kjo nuk është e vërtetë, me përgjegjësi pohoj se edhe këtë vit, sikurse edhe vitet e kaluara, mësimdhënësit do të marrin pagë më të lartë për 7 për qind në prill", tha ministrja Janevska, duke iu përgjigjur pyetjes së gazetarit para mbajtjes së Forumit të tretë Ekonomik të Gruas në Shkup.

 Shkup - Shkollat ​​janë të sigurta, fëmijët janë të sigurt. Ajo që duhet të bëjnë është të mësojnë  më shumë, porositi sot ministrja e Arsimit dhe Shkencës Vesna Janevska. Ajo shtoi se sipas informacioneve që disponon, janë kryer të gjitha kontrollet e sigurisë si në shkollat ​​fillore ashtu edhe në ato të mesme dhe se janë të sigurta.

Shkup - Transporti publik qarkullon sipas itinerarit të së dielës gjatë fundjavës së zgjatur për shkak të festës fetare të Fitër Bajramit. Sot pikat për shitjen e biletave dhe qendrat e personalizimit në shërbim janë ato në Qendrën e Transportit dhe në Tregun e Gjelbër. Nesër me kujdestari do të punojnë pikat për shitjen e biletave dhe qendrat e personalizimit  në Qendrën Transportuese, Tregun e Gjelbër, Autokomandë (Drejtoria e NQP "Shkup") dhe në Gjorçe Petrov.

 Shkup - Deri të enjten do të mbajë mot me vranësira të ndryshueshme me reshje të kohëpaskohshme shiu.  Vende-vende moti do të jetë i paqëndrueshëm, sidomos pasdite, ndërsa lokalisht do të ketë kushte për shfaqjen e stuhive afatshkurtra me reshje të dendura, mbi 15 litra për metër katror në një kohë të shkurtër, bubullima dhe erë të fortë. Siç informojnë nga DPHM, stabilizim të motit do të ketë të premten.  

Damask - Presidenti sirian Ahmed al Shara ka formuar një qeveri të re kalimtare, duke emëruar 23 ministra në një kabinet të zgjeruar, i cili shihet si një moment kyç në tranzicionin nga dekada e sundimit të familjes Asad dhe përmirësimin e lidhjeve të Sirisë me Perëndimin, njoftuan agjencitë botërore. Rebelët në Siri, të udhëhequr nga lëvizja Hajat Tahrir al Sham, morën pushtetin në vend në dhjetor të vitit të kaluar, pasi rrëzuan presidentin sirian Bashar al Asad.

Tel Aviv - Izraeli mbrëmë konfirmoi se nga vendet ndërmjetësuese ka marrë propozimin e ri për armëpushimin dhe lirimin e pengjeve dhe shtoi se ka dorëzuar kundërofertë, transmetoi "Tajms of Izrael". Jerusalemi paraqiti kundërpropozimin e tij në koordinim të plotë me Shtetet e Bashkuara të Amerikës, shkruan "Tajms of Izrael". Kumtesa izraelite vijon pas raporteve mediatike se Hamasi ka rënë dakord me një propozim egjiptian sipas të cilit do të lironte pesë pengje të gjalla në këmbim të një armëpushimi 50-ditor në Gaza.

Seul - Koreja e Jugut, Kina dhe Japonia sot në Seul mbajtën një takim të përbashkët ekonomik, për herë të parë në pesë vitet e fundit, në një përpjekje për të nxitur tregtinë rajonale ndërsa përballen me tarifat nga presidenti amerikan Donald Tramp. Ministrat e tregtisë të tre vendeve ranë dakord të punojnë ngushtë së bashku për të arritur një marrëveshje të tregtisë së lirë midis Koresë së Jugut, Kinës dhe Japonisë për të promovuar tregtinë rajonale dhe globale, thuhet në kumtesën e publikuar pas takimit.

Nejpido - Një tjetër tërmet i fuqishëm është regjistruar mëngjesin e sotëm në Mjanmar, njoftoi Instituti Sizmologjik Evropian-Mesdhetar. Epiqendra e tërmetit, me magnitudë prej 5.1 ballë të shkallës Rihter, ishte 39 kilometra nga Mandalej në një thellësi prej dhjetë kilometrash.

Bangkok - Qentë dhe robotët e kërkimit janë të përfshirë në hetimin e të mbijetuarve në Bangkok pas tërmetit me magnitudë prej 7.7 ballë që goditi pardje Mjanmarin, i cili u ndje dhe shkaktoi shkatërrime në Tajlandë, kumtuan autoritetet e qytetit. Ata deklaruan se shenjat e para të progresit u shfaqën në fillim të ditës së tretë të tërmetit të fortë. "Grumbulli i madh i rrënojave pranë ndërtesës shumëkatëshe të shembur është një tregues se sa punë kanë bërë ekskavatorët gjatë natës. Këtë mëngjes dëgjuam se shpëtimtarët gjetën shenja jete për një person nën rrënoja, gjë që u konfirmua nga skanerët dhe qentë kërkues," tha një zyrtar i paidentifikuar, duke shtuar se roboti u përdor për të gjurmuar rrugën", raporton Bi-Bi-Si.

Majami - Presidenti finlandez Aleksandar Stub u takua mbrëmë me presidentin amerikan Donald Tramp në pronën e tij në shtetin e Floridës, ku të dy liderët diskutuan për forcimin e partneritetit dypalësh të vendeve të tyre dhe luajtën një raund golfi. Finlanda është prodhuesi kryesor në botë i akullthyesve - rreth 80 përqind e këtyre anijeve janë projektuar nga kompani finlandeze dhe rreth 60 përqind e tyre janë ndërtuar në kantieret finlandeze.