Uashington, 6 nëntor 2025 (MIA) - I nominuari i presidentit amerikan për kreun e NASA-s, miliarderi Xhared Isakman, ka propozuar dërgimin e një misioni pa pilot në Mars që vitin e ardhshëm, raportoi Blumberg.

Blumberg pretendon se ka fragmente nga plani i Isakman për "Projektin Atena".

Në dokument theksohet se një nga kompanitë e afta për të ndihmuar SHBA-në të dërgojnë një mision në Mars mund të jetë SpejsIks i miliarderit Ilon Mask. Ai përmend gjithashtu një bashkëpunim të mundshëm midis NASA-s dhe Blu Orixhin, Roket Lab dhe Aksio Spejs.

Isakman ka konfirmuar më parë ekzistencën e "Projektit Atena". Atena ishte me të vërtetë një projekt për të cilin unë dhe një grup shumë i vogël njerëzish kishim punuar që nga emërimi im i parë dhe tërheqja e tij në maj. "Pjesë të këtij plani janë tashmë të vjetruara", shkroi miliarderi në faqen e tij në rrjetin social "X". Ai gjithashtu vuri në dyshim pse dokumenti u zbulua në media vetëm tani: "Duket se disa po lejojnë politikën të ndërhyjë në misionin (NASA) dhe qëllimet e presidentit në hapësirë".

Më herët këtë vit, Tramp e kishte nominuar Isakman për të drejtuar NASA-n. Më 30 prill, Komiteti i Senatit Amerikan për Tregti, Shkencë dhe Transport rekomandoi që Isakman të konfirmohej për këtë pozicion. Votimi përfundimtar për nominimin e tij pritej të zhvillohej në Senat në qershor. Megjithatë, më 31 maj, udhëheqësi amerikan njoftoi se po tërhiqte kandidaturën e Isakman dhe se kishte ndërmend të nominonte një kandidat të ri për këtë pozicion.

Mediat amerikane e quajtën Isakmanin një mbrojtës të Maskut. sa/

foto: Polaris programi