Dibër, 5 dhjetor 2025 (MIA) - Ambasadori i Shqipërisë në vendin tonë, Denion Meidani, sot ishte për vizitë në Dibër, ku u takua me kryetarin e komunës Fisnik Mela, të cilit fillimisht i uroi për zgjedhjen, duke i uruar suksese në kryerjen e funksionit.

 "Takimi u mbajt në një frymë bashkëpunimi të hapur, duke reflektuar marrëdhëniet e shkëlqyera midis institucioneve dhe interesin e përbashkët për zhvillimin e rajonit, informuan nga komuna.

Gjatë bisedës, kryetari Mela theksoi rëndësinë e projekteve ndërkufitare, dhe veçanërisht progresin drejt funksionalizimit të projektit "One Stop" në vendkalimin kufitar "Bllatë" pranë Dibrës. 

"Ky është një hap i rëndësishëm drejt lehtësimit të lëvizjes së automjeteve, shkurtimit të procedurave dhe rritjes së efikasitetit të kalimit të qytetarëve midis dy vendeve. Ai theksoi se kjo iniciativë drejtpërdrejt do të kontribuojë në bashkëpunimin ekonomik, zhvillimin e turizmit midis Dibrës dhe rajoneve përreth", shtojnë nga komuna.

Ambasadori Meidani e vlerësoi lart punën e Komunës së Dibrës dhe konfirmoi mbështetjen e vazhdueshme të Ambasadës së Republikës së Shqipërisë për projektet që përmirësojnë infrastrukturën dhe bashkëpunimin ndërkufitar. 

 Ai shprehu besim se projekti "One Stop" do të jetë një nga përfitimet më konkrete për qytetarët dhe një shembull i bashkëpunimit të suksesshëm rajonal.

Të dyja palët ranë dakord të thellojnë komunikimin dhe të inkurajojnë projekte të reja që do të kontribuojnë në zhvillimin e qëndrueshëm dhe do të lehtësojnë jetën e përditshme të qytetarëve të të dy vendeve. 

 Foto: Komuna e Dibrës