Shkup, 21 nëntor 2025 (MIA) - Ministri i Shëndetësisë, Azir Aliu sot theksoi se po krijojnë një matricë të resurseve njerëzore në shëndetësi, sipas së cilës do të krijohen gjitha politikat nga sot e tutje, që do të thotë se nuk do të ketë më hapje të konkursit për specializantë sipas qyteteve, me kërkesë të institucionit nëse nuk përputhet me atë matricë të të dhënave mbi kapacitetet njerëzore.

"Të dhënat tona do të jenë pjesë e analizave së bashku me Ministrinë e Arsimit dhe Shkencës. Krijojmë strategji kombëtare për 10 vjet për kapacitete njerëzore. Sipas këtyre analizave do të dimë dhe do t'i kërkojmë Ministrisë së Arsimit dhe Shkencës të hapë sa më shumë kapacitete të lira në arsimin e mesëm dhe të lartë, në mënyrë që pastaj t'i përshtatim ato sipas kërkesave tona krahasuar me standardet evropiane. Për tridhjetë vjet, Ministria e Shëndetësisë nuk kishte një matricë të të punësuarve dhe të klasifikuar në nivel institucioni, jo vetëm në nivel qyteti", tha Aliu, duke iu përgjigjur pyetjes së gazetarëve pas konferencës për shtyp mbi fillimin e analizës së të dhënave mbi gjendjen aktuale të resurseve njerëzore në institucionet publike dhe private shëndetësore në mbarë vendin.

Theksoi se numri i profesionistëve në shëndetësi është rritur gjatë kësaj periudhe, por resurset njerëzore në shëndetësi janë ende të pamjaftueshme sipas standardeve evropiane dhe ka mungesë mjekësh dhe infermierësh.

"Numri i mjekëve është rritur minimalisht në dekadën e fundit nga 265 për 100.000 banorë në vitin 2010 në 296 për 100.000 banorë në vitin 2020. Por kjo është larg mesatares së BE-së, sipas së cilës ka 412 mjekë për 100.000 banorë. Numri i infermierëve është rritur nga 356 në 100.000 në vitin 2010, në 440 për 100.000 banorë në vitin 2020 që është mezi gjysma e standardeve të BE-së sipas të cilave ka 838 infermierë për 100.000 banorë”, tha Aliu.

Ai theksoi se sot është tashmë e qartë në secilin institucion se sa infermierë ka, çfarë lloj stafi kanë dhe ata janë të profilizuar me 550 klasifikime sipas ISO standardeve dhe tashmë ekziston një fotografi e qartë dhe e saktë, prandaj u duhej kohë për krahasim.

"Po bëjmë ndryshimin e ligjeve, ky mjet do të jetë i detyrueshëm dhe sipas kësaj, unë si ministër do të duhet të jap ose jo pëlqimin në një institucion shëndetësor se cili profil do të na duhet dhe kjo do të jetë e lidhur edhe me atë strategji kombëtare për dhjetë vjet. Tashmë do kemi një kornizë dhe një hallkë sipas të cilit ministri do të kufizohet në dhënien e një mendimi pozitiv për diçka që nuk është e nevojshme në shëndetësi. Fatkeqësisht, tani kemi organizim të pamjaftueshëm të kapaciteteve shëndetësore. Ka profile që janë më shumë se të nevojshme në vend dhe ka profile që mungojnë të cilat do të jenë prioritet në të ardhmen. Do të rishpërndajmë kapacitetet njerëzore. Kjo do të thotë që nëse institucioni A ka pesë mjekë nga zona A, ndërsa nevojiten vetëm tre, atëherë dy do të duhet të shkojnë në institucionin B, sepse atje ka mungesë", ka thënë Aliu, sipas të cilit me këtë riorganizim të kapaciteteve njerëzore, siç shpjegon ai, “do të jemi në gjendje të optimizojmë resurset njerëzore në këtë fazë, por kjo nuk do ta zgjidhë problemin e mungesës së kuadrit mjekësor”.

Foto: MIA