Сеул, 13 јануари 2025 (МИА) – Најмалку 300 севернокорејски војници кои се бореле на страната на Русија против Украина се убиени во борбите, а околу 2.700 се ранети, соопшти утрово јужнокорејската Национална разузнавачка служба (НИС).

Информацијата била соопштена за време на состанокот зад затворени врати на парламентарната комисија за разузнавање, рече пратеникот Ли Сеунг-Квон од владејачката Партија на моќта на народот. Ли изјави дека НИС исто така информирала дека Северна Кореја им наредила на своите војници да се самоубијат за да не бидат заробени живи од украинската војска. Пратеникот рече дека еден од двајцата севернокорејски војници заробени од украинските сили во регионот Курск во Русија, одбил понуда за азил во Јужна Кореја.

Во речиси триминутното видео, кое украинскиот претседател Володимир Зеленски го објави вчера на Х, еден од ранетите севернокорејски војници вели дека сака да остане во Украина на прашањето дали сака да се врати дома. јт/