Охрид, 16 октомври 2023 (МИА) - Центарот за развој на Југозападниот плански регион и општините Вевчани, Дебар, Пласница, Кичево и Охрид со дводневна обука организирана од страна на УНДП, почнаа со реализација на проектот за подготовка на проектно-техничка документација, насочена кон подобрување на патната и комуналната инфраструктура во Регионот.

Експерти од областа на инфраструктурата, заедно со претставници на Центарот за развој и на општините за време на дводневната обука разработуваа клучни елементи од проектниот циклус, во сферата на градежништвото.

Проектот што го спроведува Центарот за развој изнесува околу четири милиони денари, а предвидува изготвување документација потребна за отпочнување процес на реконструкција, рехабилитација и изведба на локалната патна мрежа во споменатите општини, како и канализациска мрежа во Пласница.

Проектот е одобрен  во рамките на првиот циклус грантови за изработка на техничка документација, поддржан од страна на владата на Шведска, УНДП и од Бирото за регионален развој. аб/цр

фото:Југозападен плански регион