• петок, 01 март 2024

Членови на ДПМ: Кристина Николовска и Христо Петрески се обидуваат да го уништат ДПМ

Членови на ДПМ:  Кристина Николовска и Христо Петрески се обидуваат да го уништат ДПМ

Скопје, 25 ноември 2023 (МИА) - Членови на Друштвото на писателите на Македонија (ДПМ) преку писмено соопштение информираат дека денеска на Вонредното изборно собрание претседателката на Собранието на ДПМ во заминување Кристина Николовска и претседателот на ДПМ во оставка Христо Петрески извршија, како што велат, обид за целосно уништување на македонската писателска асоцијација формирана во 1947 година од Конески, Шопов, Јаневски, Митрев, Чашуле, Иљоски, Крле, Малески и Точко.

- Ударот врз ДПМ беше подготвуван изминатиот период од претседателката на Собранието на ДПМ, Кристина Николовска со тоа што: и покрај барањето на членови за увид и прочистување на Избирачкиот список, таа не го овозможи тоа и во списокот останаа починати лица; оневозможи членовите на ДПМ што живеат надвор од земјата да гласаат на Вонредното изборно собрание, без да прифати и понуди решение нивното очекувано отсуство да не влијае на кворумот на седницата; ги демотивираше членовите на ДПМ што живеат надвор од Скопје да дојдат на Вонредото изборно собрание со тоа што не одговори на нивните прашања за подмирување на патните трошоци; повеќе од половина од членството на ДПМ според јавно објавениот список на веб-страницата на ДПМ, што не користи електронска пошта, воопшто не беше информирано за одржувањето на Вонредото изборно собрание, и покрај обврската на претседателот на Собранието преку други начини на комуникација да ги информира и да им ги достави материјалите за седницата, се вели во соопштението.

Доказ за планираното и тенденциозно опстроурирање на Вонредното изборно собрание од страна на Кристина Николовска е, како што се наведува, и тоа што на денешната седница на беа повикани медиумите.

-Во ситуација кога ДПМ е во криза која е незапаметена во неговата историја, зачудува шо денес, на седницата не беше присутен ниту еден претставник на медиумите, поради што ги повикуваме на нивна будност имајќи го предвид значењето на ДПМ за македонската култура и македонската држава, стои во соопштението.

Според членовите на ДПМ, сето она што Кристина Николовска со поддршка од Христо Петрески го подготвуваше изминатиот период, денес, како што се наведува, на Вонредното изборно собрание резултираше со необезбедување присуство на поголем број членови на ДПМ, што намерно беше форсирано од нејзина страна од објавувањето на датумот на Вонредното изборно собрание наваму.

- Денес, по изведување на планираното сценарио на Кристина Николовска што Христо Петрески го поддржа и со напуштање на салата на ДПМ петнаесет минути пред констатирање на бројот на присутните членови, претседалката на Собранието, Николовска: не овозможи дискусија и предлози од присутните; ги напушти просториите на ДПМ, без ни малку почит кон македонскиот писател и кон македонската книжевност; домот на македонските писатели го остави на техничко лице повикано од нејзина страна без некакви службени овластувања и без пишан правен документ да биде гарант за сето културно наследство во просториите на ДПМ, стои во соопштението.

Членови на Друштвото на писателите на Македонија истакнуваат дека ДПМ е дом на сите македонски писатели и информираат дека мнозинството од присутните членови на Вонредното изборно собрание продолжило со дискусија и оти се донесени заклучоци. 

- Од Кристина Николовска се бара: итно да пристпи кон организација на продолжение на седницата на Собранието на 27 јануари 2024 година; итно да пристапи кон прочистување на списокот на ДПМ од починати членови и да овозможи јавен увид во списокот; според практиката што е применувана на претходните изборни собранија, а имајќи го предвид и оневозможувањето од страна на Кристина Николовска онлајн да гласаат членовите на ДПМ што живеат надвор земјата, тие да бидат изземени од Избирачкиот список поради утврдување на квориумот. Напоменуваме дека членовите што не живеат во земјата беа изземени од Избирачкиот список на сите претходни изборни собранија, вклучително и при изборот на Кристина Николовска и Христо Петрески во 2022 година, а не беа изземени само сега, поради сценариото на овие личности за целосно уништување на ДПП, се вели во соопштението.

Поради спас на ДПМ, членовите бараат лицата што веќе го имаат изгубено легитимитетот од членството и немаат поднесено никаков извештај за нивната работа од стапување на функциите наваму – Кристина Николовска и Христо Петрески, веќе воопшто да не преземаат финансиски и правни дејствија во ДПМ.

- Сето ова е заведено во записник воден во текот на дискусијата. Ја известуваме јавноста дека од овој момент до продолжението на Вонредното изборно собрание, ДПМ не може да презема активности, што веројатно беше и цел на Кристина Николовска и Христо Петрески, поради обид за уништување на ДПМ. Од овој момент натаму, секое соопштение испратено од официјалната адреса на ДПМ зад коешто стојат Христо Петрески и Кристина Николовска, освен соопштение во врска со продолжението на Вонредното изборно собрание се смета нелегитимно. Кристина Николовска и Христо Петрески не им мислат добро на ДПМ, на македонската книжевност, на македонската култура и на македонската држава, потенцираат членовите на ДПМ во соопштението.

Тие доставија и своерачно потпишан список на членовите на ДПМ присутни во текот на денешната дискусија по, како што велат, минирањето на Вонредното изборно собрание од страна на Кристина Николовска.

Поради немање кворум беше откажано денешното Вонредно изборно собрание на Друштвото на писатели на Македонија (ДПМ). Како што информираа од ДПМ, откако се констатирал бројот на присутните членови, било заклучено дека немало кворум за работа.

-Од вкупно 286 члена на ДПМ, биле присутни 73 члена, а за кворум за работа на седницата потребни се 96 члена. Според тоа, на Вонредното изборно собрание на ДПМ немаше кворум за работа на седницата, се наведува во соопштението.мд/свс/

Фото: МИА архива и членови на ДПМ 

 

Остани поврзан