Скопје, 10 октомври 2025 (МИА) - Уставниот суд на Република Северна Македонија и Уставниот суд на Република Косово потпишаа меморандум за разбирање и заемна соработка во области од заеднички интерес, со кој, како што информираат од Уставен, се поставуваат основите за продлабочување и институционализирање на соработката меѓу уставните судови на двете земји.

Меморандумот го потпишаа претседателите на двата суда, Дарко Костадиновски и Неџми Реџепи и претставува резултат на досегашната успешна и конструктивна комуникација, а неговата цел е да овозможи континуиран развој на односите, унапредување на професионалните капацитети и подобрување на квалитетот на судската пракса и донесените одлуки.

-Во рамките на соработката се предвидува организирање на заеднички научни конференции, семинари и стручни обуки, како и размена на искуства, судска пракса, истражувачки резултати и релевантна литература. Со тоа се создава платформа за поголема меѓусебна поддршка и размена на добри практики во областа на уставното судство, се вели во соопштението од Уставен. 

 Потпишаниот Меморандум за разбирање стапува во сила веднаш и ќе има важност од пет години, со можност за продолжување по истекот на тој период. аа/вг/

Фото: Уставен суд на РСМ