• петок, 17 мај 2024

Турскиот министер за надворешни работи во Катар се сретна со шефот за надворешна политика на Хамас

Турскиот министер за надворешни работи во Катар се сретна со шефот за надворешна политика на Хамас

Истанбул, 17 април 2024 (МИА) – Турскиот министер за надворешни работи Хакан Фидан се сретна со шефот на палестинската милитантна организација Хамас, Исмаил Ханија, за време на посетата на Катар, пренесе ДПА повикувајќи се на Анадолија.

Цитирајќи дипломатски извори, Анадолија јавила дека прашањата за кои разговарале Фидан и Ханија вклучувале прекин на огнот во војната во Газа и ослободување на заложниците.

Според пишувањата на медиумите, и турскиот претседател Реџеп Таип Ердоган планира да се сретне со Ханија во Турција викендов.

Ердоган денеска уште еднаш ја нападна владата на израелскиот премиер Бенјамин Нетанјаху и рече дека израелскиот премиер е одговорен за смртта на илјадници деца и оти „одамна го надминал Хитлер“.

Ердоган во минатото постојано го споредуваше Нетанјаху со нацистичкиот лидер Адолф Хитлер и го обвини шефот на израелската влада дека извршил „масакр“ во Појасот Газа. Израел постојано и цврсто ги отфрла изјавите на Ердоган.

Засега не се знае кога точно ќе се одржи средбата меѓу Ердоган и Ханије. јт/

Фото: ДПА

Остани поврзан