Дамаск, 6 март 2023 (МИА) – Водоснабдителниот систем во северозападната сириска провинција Алепо, застарен и оштетен од војната, се наоѓа во опасност од колапс по земјотресот од 6 февруари, предупреди денеска Меѓународниот комитет на Црвениот крст.

Во земјотресот и вторничните потреси на сириска страна од границата загинаа околу 6.000 лица, а повеќето од жртвите се во областа под контрола на бунтовниците во близина на границата со Турција.

Земјотресот предизвика и директна штета на тамошната водоводна инфраструктура, намалувајќи ја нејзината ефикасност и зголемувајќи го ризикот од загадена вода, соопшти Меѓународниот комитет на Црвениот крст со седиште во Женева, предупредувајќи на „можен колапс“ на водоводниот систем.

-Застрашувачки голема е можноста за разорни последици по јавното здравје како резултат на земјотресот, изјави Фабрицио Карбони, регионален директор на Меѓународниот комитет на Црвениот крст за Блискиот и Блискиот Исток.

Во делови од Сирија веќе е проширена колера, а од потресот досега се пријавени најмалку два смртни случаи.

За време на земјотресот беа уништени и многу резервоари за вода на покривите, што изврши дополнителен притисок врз системот веќе оштетен по 12 години граѓанска војна. сд/